कोशी प्रदेशका मुख्यमन्त्री एवम् नेकपा एमालेका सचिव हिक्मत कार्कीले राजनीति प्रतिशोध नभई प्रतिष्पर्धा भएको बताएका छन् ।

झापाको दमकमा मंगलबार पत्रकारहरूसँग कुरा गर्दै सचिव कार्कीले राष्ट्रिय स्वतन्त्र पार्टीका वरिष्ठ नेता बालेन्द्र साहलाई लक्षित गर्दै केही उम्मेदवारहरू प्रतिष्पर्धा नभएर प्रतिशोध साँध्न मात्रै आएको बताएका छन् ।

‘केही साथीहरू प्रतिशोध साँध्न झापा ५ आएका छन् । उनीहरू यहाँबाट प्रतिष्पर्धा गर्न सिकेर जानेछन् ’ कार्कीले भने, ‘एमालेले सिद्धान्तको कुरा गर्छ । एमालेले जनताको कुरा गर्छ । प्रतिशोधको राजनीति गर्दैन ।’

एमालेका उम्मेदवार एवम् पार्टी अध्यक्ष केपी शर्मा ओलीले यस क्षेत्रमा २०४८ सालदेखि नै प्रतिनिधित्व गरेकोले उनको योगदानमा यहाँका मतदाता जानकार रहेको कार्कीले बताए ।

‘केपी ओलीलाई झापा ५ मा सामिप्यता छ । सम्बन्ध छ । माया छ । प्रेम छ ’ कार्कीले भने ‘अरू उम्मेद्वारले आफ्नो परिचय दिँदै हिँड्नु पर्ने अवस्था छ । त्यसैले पनि यो एमालेका लागि सहज क्षेत्र हो ।’

सचिव कार्कीले केपी ओलीको निर्वाचन क्षेत्र भएकोले यस क्षेत्रमा राष्ट्रिय अन्तराष्ट्रिय चासो बढेको पनि बताए । कार्कीले जुनसुकै देशी वा विदेशी निकायलाई पनि यस क्षेत्रमा आएर निर्वाचनको माहोल हेरेर जान आग्रह गरे ।

अध्यक्ष ओलीले २०४८ सालमा ओलीले चुनाव लड्दा यस क्षेत्रमा धुलौटे बाटो र पेट्रोलमेक्सको उज्यालोमा चुनावी कार्यक्रम हुने गरेकोमा अहिले अधिकांश सडक पिच, सबै क्षेत्रमा बिजुली पुगेको उनले बताए । अन्य पूर्वाधारका थुप्रै काम भइसकेकोले यहाँको जनताको रोजाइमा ओली नै पर्ने उनले बताए ।