वासिङ्टन डिसी । अमेरिकी राष्ट्रपति डोनाल्ड ट्रम्पले इरानलाई आफ्नो परमाणु कार्यक्रमबारे सम्झौता गर्नका लागि ‘समय सकिन लागिरहेको’ भन्दै कडा चेतावनी दिएका छन्। खाडी क्षेत्रमा अमेरिकी सैन्य बलको निरन्तर उपस्थितिका बीच ट्रम्पले एक विशाल अमेरिकी नौसैनिक समूह तीव्र गति, शक्ति र उत्साहका साथ इरानतर्फ अघि बढिरहेको दाबी गरेका छन्।

ट्रम्पको पछिल्लो भनाइसँगै मध्यपूर्वमा तनाव थप चर्किएको छ। अमेरिकी दबाबको जवाफ दिँदै इरानी विदेशमन्त्री अब्बास अराघचीले इरानका सशस्त्र बलहरू उच्च सतर्कतामा रहेको र कुनै पनि जल वा स्थल आक्रमणको तत्काल तथा शक्तिशाली जवाफ दिने चेतावनी दिएका छन्।

इरानले आफ्नो परमाणु कार्यक्रम पूर्ण रूपमा शान्तिपूर्ण रहेको दाबी गर्दै आएको छ। तर अमेरिका र उसका सहयोगी राष्ट्रहरूले इरानले परमाणु हतियार निर्माण गर्ने प्रयास गरिरहेको आरोप लगाउँदै आएका छन्। ट्रम्पको यो चेतावनी इरानमा हालै भएका प्रदर्शनहरूमाथि सरकारले गरेको कडा दमनको पृष्ठभूमिमा आएको हो।

इरानी मुद्राको अवमूल्यनबाट सुरु भएको प्रदर्शन पछि धार्मिक नेतृत्वको वैधतामाथि नै प्रश्न उठ्ने अवस्थासम्म पुगेको थियो। ट्रम्पले इरानी प्रदर्शनकारीहरूलाई समर्थन जनाउँदै ‘सहयोग आउँदैछ’ भन्ने सन्देशसमेत दिएका छन्।

इरानमा जारी अशान्ति र सरकारी दमनका कारण ठूलो मानवीय क्षति भएको दाबी गरिएको छ। अमेरिकास्थित ह्युमन राइट्स एक्टिभिस्ट न्यूज एजेन्सीका अनुसार डिसेम्बर अन्त्यदेखि सुरु भएका प्रदर्शनमा हालसम्म ५ हजार ९२५ प्रदर्शनकारीसहित कुल ६ हजार ३०१ जनाको मृत्यु पुष्टि भएको छ।

इन्टरनेट बन्द गरिएको अवस्थामा थप १७ हजार मृत्युको खबरबारे अनुसन्धान भइरहेको जनाइएको छ। अर्कोतर्फ, नर्वेस्थित इरान ह्युमन राइट्सले मृतकको संख्या २५ हजार नाघ्न सक्ने चेतावनी दिँदै विश्व समुदायलाई गम्भीर ध्यान दिन आग्रह गरेको छ।