काठमाडौँ । नेकपा (एमाले) को ११औँ महाधिवेशनबाट लमजुङ जिल्लाले पार्टीको केन्द्रीय नेतृत्वमा ऐतिहासिक प्रतिनिधित्व हासिल गरेको छ। महाधिवेशनको अन्तिम चुनावी परिणामअनुसार लमजुङबाट उपाध्यक्ष पदमा पृथ्वीसुब्बा गुरुङसहित ७ जना प्रभावशाली नेताहरू केन्द्रीय कमिटीमा निर्वाचित भएका हुन्।

महाधिवेशनबाट केन्द्रीय सदस्यमा कृष्णप्रसाद अधिकारी, जमिन्द्रमान घले, डा. भीष्म अधिकारी, यसोदा रिमाल, टुका हमाल र कल्पना थापा विजयी भएका छन्। एकै जिल्लाबाट यति ठूलो संख्यामा केन्द्रीय नेतृत्वमा पुगे पनि यतिबेला राजनीतिक वृत्त र सामाजिक सञ्जालमा सबैभन्दा बढी चर्चा भने कृष्णप्रसाद अधिकारीको विजयले पाएको छ।

‘न्यायको जित’ का रूपमा चर्चा
कृष्णप्रसाद अधिकारीको विजयलाई एमालेभित्र ‘न्यायको जित’ र राजनीतिक पुनरागमनको रूपमा हेरिएको छ। यसअघि सम्पन्न जिल्ला अधिवेशनमा पार्टीभित्रैको तीव्र घेराबन्दीका कारण उनले जिल्ला अध्यक्ष पदमा अप्रत्याशित पराजय भोग्नुपरेको थियो। जिल्ला नेतृत्वमा अन्यायपूर्ण पराजय बेहोरे पनि संगठनप्रतिको निष्ठा नडगमगाएका अधिकारीलाई देशभरका महाधिवेशन प्रतिनिधिले केन्द्रीय सदस्यमा लोकप्रिय मत दिएर अनुमोदन गरेका हुन्।

जिल्लामा पराजित भएपछि केन्द्रमा शक्तिशाली उदय हुनुलाई कार्यकर्ताहरूले नेतृत्वको घेराबन्दीविरुद्ध आम कार्यकर्ताको विद्रोह र अधिकारीमाथिको न्यायका रूपमा अर्थ्याएका छन्।

संगठन पुनर्निर्माणको आशा
अधिकारीको विजयसँगै अब उनले लमजुङ जिल्ला इन्चार्जको जिम्मेवारी पाउने विश्वास कार्यकर्ताहरूले गरेका छन्। विगतमा जिल्ला सचिव र अध्यक्षका रूपमा उनले प्रदर्शन गरेको संगठन विस्तार, कुशल कार्यकर्ता परिचालन र चुनावी रणनीति बनाउने क्षमताका कारण पनि आम कार्यकर्ता उनीप्रति आशावादी देखिएका हुन्।

पछिल्लो समय लमजुङ एमालेभित्र देखिएको केही सुस्तता र आन्तरिक समीकरणका कारण कमजोर बन्दै गएको संगठनलाई अधिकारीको आगमनले पुनः चलायमान, अनुशासित र जनमुखी बनाउने अपेक्षा गरिएको छ।

नयाँ राजनीतिक पुनर्जागरणको संकेत
एमाले कार्यकर्ताहरूका अनुसार अधिकारीको केन्द्रीय सदस्यमा विजय केवल व्यक्तिगत सफलता मात्र नभई लमजुङ एमालेका लागि नयाँ राजनीतिक पुनर्जागरणको संकेत हो। संगठनभित्रको गुटबन्दी अन्त्य गरी निष्ठावान कार्यकर्ताको मनोबल उच्च बनाउने जिम्मेवारी अब अधिकारीको काँधमा आएको विश्लेषण भइरहेको छ।

लमजुङबाट केन्द्रमा पुगेको यो बलियो टोली र विशेषगरी कृष्णप्रसाद अधिकारीको उदयले आगामी निर्वाचनहरूमा एमालेलाई थप मजबुत बनाउने र जिल्लामा पार्टीको साख पुनः उँचो बनाउने विश्वास लिइएको छ।