१३ पुस, काठमाडौँ। नेपाल कम्युनिभर्सिटी र काठमाडौँ विश्वविद्यालयको सहकार्यमा समुदाय केन्द्रित स्नातकोत्तर कार्यक्रम सञ्चालन हुने भएको छ। सामाजिक नवप्रवर्तन तथा उद्यमशीलता विषयमा स्नातकोत्तर कार्यक्रम सुरु गर्न शुक्रबार सम्झौता गरिएको हो।

कार्यक्रमअन्तर्गत विद्यार्थीहरूले समुदायमै गएर अध्ययन, सिकाइ र अभ्यास गर्नेछन्। उनीहरू नेपालको हिमाल, पहाड र तराईका समुदायमा यात्रा गर्दै स्थानीय परिवेशमा बसोबास गरी अध्ययन गर्ने व्यवस्था गरिएको छ।

विद्यार्थीहरूको समग्र विकासका लागि नेपाल तथा नेपाली डायस्पोराका विज्ञ र अनुभवी व्यक्तिहरूलाई मेन्टरका रूपमा संलग्न गराइनेछ। नेपाल कम्युनिभर्सिटीले अनुसन्धान र समुदाय–आधारित अघिल्ला कार्यक्रमबाट प्राप्त अनुभव, समुदायसँगको सहकार्य तथा सामाजिक नवप्रवर्तन र उद्यमशीलतामा केन्द्रित दृष्टिकोण यस कार्यक्रममार्फत प्रदान गरिने जनाएको छ।