२२ मंसिर, विराटनगर । नेकपा एमालेको ११ औं महाधिवेशनका लागि प्रतिनिधि छनोटमा धनकुटा र ओखलढुंगामा देखिएको विवाद अखेर लेनदेनमार्फत समाधान भएको छ। केन्द्रले पुन: प्रतिनिधि छनोट गर्न निर्देशन दिएपछि दुबै पक्षले आपसी सहमतिका आधारमा प्रतिनिधिको सूची मिलाएका हुन्।

धनकुटामा संस्थापन पक्षले र ओखलढुंगामा इतर पक्षले एकलौटी रुपमा प्रतिनिधि चयन गरी केन्द्रमा पठाएपछि विवाद उत्पन्न भएको थियो। केन्द्रले दुवै जिल्लाको सूची फिर्ता पठाउँदै पुन: प्रक्रिया अघि बढाउन आदेश दिएको थियो।

सहमतिअनुसार धनकुटामा संस्थापन पक्षले एकलौटी गरेको प्रतिनिधि सूचीमा इतर पक्षका २ जनालाई समेटिएको एमाले स्रोतले जनाएको छ। धनकुटाका १३ प्रतिनिधिमध्ये शान्तिराम गौतम र अर्जुन छाराहाङलाई फिर्ता बोलाई इतर पक्षका निरेन तामाङ र मनोज राई थपिएका हुन्।

त्यस्तै ओखलढुंगामा १२ प्रतिनिधिमध्ये संस्थापन पक्षका ४ प्रतिनिधि थपिएका छन्। ओली पक्षबाट पूर्वजिल्ला अध्यक्ष मोहनकुमार श्रेष्ठ, जिल्ला उपसचिव अस्मिता थापा, संविधानसभा सदस्य हर्कबोल राई र शकुन्तला राजभण्डारी प्रतिनिधिमा चयन भएका छन्।

इतर पक्षबाट जीबी खड्का, अम्बिरबाबु गुरुङ, कमल न्यौपाने, इच्छाकुमारी गुरुङ, राजीव कटुवाल, रमिला मगर श्रेष्ठ, टीका धमला र ज्यानु कालिकोटे रहेका छन्।

एमाले कोशी प्रदेश अध्यक्ष घनश्याम खतिवडाका अनुसार केन्द्रको निर्देशनअनुसार दुबै जिल्लामा सहमतिमार्फत प्रतिनिधि छनोट प्रक्रिया पूरा गरी केन्द्रमा सूची पठाइएको छ।
‘दुवै जिल्लामा सहमतिका आधारमा प्रतिनिधि छनोट गरेका छौं,’ खतिवडाले भने, ‘छनोट गर्दा केहीलाई फिर्ता बोलाएर नयाँ प्रतिनिधि पठाइएको हो।’