काठमाडौं, १५ पुस — निर्वाचन आयोगले आगामी प्रतिनिधि सभा निर्वाचनका लागि मतपत्र छपाइ प्रक्रिया अघि बढाएको छ। आयोगका अनुसार सुरुमा समानुपातिकतर्फको र त्यसपछि प्रत्यक्षतर्फको मतपत्र छापिनेछ।

भक्तपुरको सानोठिमीस्थित जनक शिक्षा सामग्री केन्द्रमा मतपत्र छपाइ हुनेछ। पुस १६ गतेदेखि छपाइ सुरु गर्ने तालिका तय गरिएको आयोगले जनाएको छ। सहायक प्रवक्ता कुलबहादुर जीसीका अनुसार ५८ राजनीतिक दल र ६४ निर्वाचन चिह्न टुंगो लागेकाले समानुपातिकतर्फको मतपत्र पहिला छापिनेछ।

फागुन २१ गते हुने निर्वाचनका लागि १ करोड ९० लाखभन्दा बढी मतदाता नामावली अद्यावधिक गरिएको छ। समानुपातिकतर्फ कुल मतदाताको १० प्रतिशत अतिरिक्त मतपत्र छाप्ने नीति अनुसार छपाइ गर्न २०–३० दिन लाग्ने अनुमान गरिएको छ। समानुपातिकको काम सकिएपछि उम्मेदवारको अन्तिम नामावली प्रकाशित भएपछि प्रत्यक्षतर्फको मतपत्र छापिनेछ।