म्याग्दी । म्याग्दीको सदरमुकाम बेनी बजारबाट पश्चिमी क्षेत्रका तीन स्थानीय तहलाई जोड्ने बेनी–दरवाङ सडकको वैकल्पिक मार्गका रूपमा रहेको महारानीथान–छाप–डाडाखेत–ठूलोखोला सडकअन्तर्गत टुनीखर्क खण्डमा स्तरोन्नतिको काम सुरु गरिएको छ ।

बेनी नगरपालिकाले करिब १८ वर्षअघि ‘ट्रयाक’ खुलेको यस सडकलाई फराकिलो बनाउने, नाली र पर्खाल निर्माण गर्ने तथा ढलान र कालोपत्रको काम अघि बढाएको हो । एक करोड ६१ लाख रुपैयाँ लागत अनुमान गरिएको योजनाको ठेक्का एक करोड १५ लाख रुपैयाँमा शंकर निर्माण सेवाले पाएको छ । निर्माण कम्पनीले डोजर परिचालन गरी सडक फराकिलो पार्ने र पर्खाल निर्माणको काम सुरु गरिसकेको छ ।

निर्माण कार्यको ठेक्का म्याद आगामी जेठ १५ गतेसम्म रहेको छ । योजनाअन्तर्गत ३५० मिटर सडकमा प्रिमिक्स प्रविधिबाट कालोपत्र तथा ४०० मिटर सडक ढलान गरिने बेनी नगरपालिकाका सिनियर सब–इञ्जिनियर कमल थापाले जानकारी दिए । उनका अनुसार ३५० मिटरमा पक्की नाला र करिब ४०० घनमिटर पलम पर्खाल निर्माण हुनेछ ।

हाल साँघुरो रहेको सडकलाई छ मिटर चौडाइमा विस्तार गरिनेछ । आर्थिक वर्ष २०६४/६५ मा ट्रयाक खोलिएको यो सडक बेनी नगरपालिका–७, ६, ५ र ४ नम्बर वडा जोड्ने महत्वपूर्ण मार्ग हो । बेनी–दरवाङ सडकअन्तर्गत बेनी–ठूलोखोला खण्डको रणनीतिक वैकल्पिक मार्गका रूपमा यस सडकको विशेष महत्त्व रहेको बेनी नगरपालिका–६ का वडा अध्यक्ष कृष्णसिंह बानियाले बताए ।

रणनीतिक महत्त्वका कारण पछिल्लो चार वर्षदेखि महारानीथानबाट डाँडाबारी–छाप, डाडाखेत हुँदै ठूलोखोलासम्मका विभिन्न खण्डमा स्तरोन्नतिको काम हुँदै आएको छ । आर्थिक वर्ष २०८०/८१ मा बेनी नगरपालिका–६ को ढलेढुङ्गा–डाँडाबारी खण्डमा कालोपत्र सम्पन्न भएको थियो ।

यस्तै, आर्थिक वर्ष २०८१/८२ मा छाप क्षेत्रमा गरिएको कालोपत्र गुणस्तरीय नभएपछि मापदण्डअनुसार काम गर्न निर्माण व्यवसायीको धरौटी रकम रोक्का गरिएको वडा अध्यक्ष बानियाले बताए । यसअघिल्ला वर्षमा ठूलोखोलाबाट डाडाखेत खण्डमा घुम्ती सुधार, मोड सुधार र ढलान गरिएको थियो ।

बेनी नगरपालिकाले यस सडकलाई गौरवको आयोजनाका रूपमा लिएर महारानीथानदेखि छाप हुँदै डाडाखेततर्फ स्तरोन्नतिको कामलाई निरन्तरता दिएको छ । मार्ग खुलेको १८ वर्षपछि पक्की सडक निर्माण सुरु भएकोमा स्थानीयवासी खुसी भएको स्थानीय भुवन आचार्यले बताए ।