नेपाल कम्युनिस्ट पार्टी (माओवादी) सल्यानको कुमाख गाउँ कमिटीले संगठन विस्तार, जनसंघर्ष, उत्पादनमा वृद्धि र जनतासँगको सम्बन्धलाई मजबुत बनाउने गरी महत्वपूर्ण निर्णयहरू गरेको छ। गाउँ कमिटीको पाँचौँ बैठक कमिटीकै उत्पादन केन्द्र मर्मज्युला, रागेचौरमा सम्पन्न भएको छ, जसले पार्टीको उत्पादन नीतिलाई थप व्यवस्थित बनाउने र जनसम्बन्धलाई बलियो बनाउने निर्णय गरेको छ।

गाउँ कमिटीका सचिव कमरेड गोकर्ण सीको अध्यक्षतामा सम्पन्न उक्त बैठकमा पार्टीका केन्द्रीय सदस्य तथा जिल्ला सचिव कमरेड अनिल सी (तेजबहादुर खड्का) प्रमुख अतिथिका रूपमा उपस्थित हुनुहुन्थ्यो। यसैगरी, केन्द्रीय सदस्य कमरेड भीमसेन सी (भीम भारती) विशेष अतिथिका रूपमा सहभागी हुनुभएको थियो। बैठकमा जिल्ला सचिवालय समिति सदस्य तथा कुमाख गाउँ कमिटीका इन्चार्ज कमरेड एकेन्द्र सी (एकेन्द्र शाह) सहित जिल्ला सल्लाहकार समिति सदस्यहरू र पूर्व जनमुक्ति सेनाका कमाण्डरहरूको समेत उल्लेख्य सहभागिता रहेको थियो।
बैठकले समसामयिक राजनीतिक अवस्था, संगठन विस्तार, जनसंघर्षका कार्यक्रम तथा आर्थिक र उत्पादनसम्बन्धी प्रस्तावहरूमाथि छलफल गरी निर्णयहरू गरेको छ।

संगठनलाई उत्पादनसँग जोड्ने पार्टीको नीतिअनुसार कुमाख गाउँ कमिटीले सञ्चालन गरेको सामूहिक धानखेतीलाई थप व्यवस्थित बनाउने निर्णय गरिएको छ। यस वर्ष कमिटीको धानबाली उत्पादन ५० मुरी भएको र खर्च कटाएर ३० हजार रुपैयाँ बचत भएको जानकारी केन्द्रिय सदस्य भिमसेन सीले दिनुभयो। बचत भएको उक्त रकम संगठनात्मक गतिविधि तथा जनमुखी कार्यक्रमहरूमा प्रयोग गरिने बताइएको छ।

उत्पादन वृद्धिको कार्यक्रमलाई निरन्तरता दिँदै बैठकले सामूहिक हिउँदेबाली (गहुँ, जौ, आलु आदि) को खेतीलाई समेत व्यवस्थित गर्ने योजना बनाएको छ। यसका लागि नयाँ उत्पादन केन्द्रहरू पहिचान गरी तत्काल कार्ययोजना बनाउने निर्णय गरिएको छ। यसैगरी, पार्टीले जनतासँगको सम्बन्धलाई अझ प्रगाढ बनाउन 'जनतासँग माओवादी' विशेष अभियान सञ्चालन गर्ने निर्णय गरेको छ। यो अभियानमार्फत स्थानीय जनताका समस्या र गुनासा सुन्ने, जनमुखी विकास निर्माणका कार्यमा सहभागिता जनाउने र उत्पादनमा जनतालाई सहभागी गराउने कार्यक्रमहरूलाई प्राथमिकता दिइनेछ।

पछिल्लो समय विप्लव नेतृत्वको माओवादीले संगठन विस्तारलाई तीव्रता दिइरहेको सन्दर्भमा सल्यान जिल्ला पार्टीको सशक्त आधार क्षेत्रका रूपमा विकसित हुँदै गएको नेताहरूको धारणा छ। बैठकले संगठन, संघर्ष र उत्पादनलाई सँगसँगै अघि बढाउने पार्टीको अभ्यासले जनस्तरमा सकारात्मक प्रभाव पारेको निष्कर्ष निकालेको छ। सहभागी नेताहरूले कुमाख गाउँ कमिटीको यो उत्पादन, संगठन र जनसम्बन्धको अभ्यास अन्य कमिटीहरूमा पनि विस्तार गर्नुपर्नेमा जोड दिएका छन्।