१८ कात्तिक, काठमाडौं । नेकपा (माओवादी केन्द्र) का नेता जनार्दन शर्माले नयाँ राजनीतिक अभियान ‘वाम–प्रगतिशील ध्रुवीकरण’ सुरु गर्ने घोषणा गरेका छन्। माओवादी केन्द्र र एकीकृत समाजवादीबीचको एकता प्रक्रियामा असहमति जनाउँदै उनले आज दिउँसो पत्रकार सम्मेलनमार्फत नयाँ ध्रुवीकरणको घोषणा गर्न लागेका हुन्।

यसअघि माओवादी केन्द्र, एकीकृत समाजवादीलगायत आठ घटकबीच आइतबार (कात्तिक १६ गते) पार्टी एकताको घोषणा भएको थियो। प्रचण्ड नेतृत्वको माओवादी केन्द्र, माधवकुमार नेपाल नेतृत्वको एकीकृत समाजवादी, जनसमाजवादीका अध्यक्ष सुवासराज काफ्ले, समाजवादीका महेन्द्रराय यादव, नेकपाका महासचिव चिरन पुन, समाजवादीका अध्यक्ष राजु कार्की, माओवादी समाजवादीका अध्यक्ष कर्णजित बुढाथोकी र साम्यवादीका अध्यक्ष प्रेमबहादुर सिंहले सहमति पत्रमा हस्ताक्षर गरेका थिए। त्यसको भोलिपल्ट गोपाल किराँतीले पनि माओवादी केन्द्रसँग एकता गर्ने सहमति जनाएका थिए।

यी दलहरूले कात्तिक १९ गते काठमाडौंको भृकुटीमण्डपमा एकता घोषणा सभा गर्ने तयारी गरेका छन्।

तर, सो प्रक्रियामा नरहेका माओवादीका असन्तुष्ट नेताहरू जनार्दन शर्मा, राम कार्की, एकीकृत समाजवादीका झलनाथ खनाल र घनश्याम भूसाल, साथै नेत्रविक्रम चन्द ‘विप्लव’ लगायतका नेताहरूबीच नयाँ वाम–प्रगतिशील ध्रुवीकरणको तयारी भइरहेको छ।

शर्माले माओवादी आन्दोलनलाई पुनर्गठित गर्दै नयाँ दिशामा लैजाने बताएका छन्। उनका अनुसार, “अहिलेको माओवादी पार्टीले आन्दोलनको स्पिरिट गुमाएको छ, त्यसैले नयाँ बाटो आवश्यक छ।”

अन्तिम प्रयासस्वरूप माओवादी अध्यक्ष प्रचण्डले आइतबार जनार्दन शर्मा र सोमबार बिहान घनश्याम भूसाललाई भेटेर एकतामा सहभागी हुन आग्रह गरेका थिए। तर, शर्माले प्रचण्डको प्रस्ताव अस्वीकार गर्दै भनेका छन्,“तपाईं अर्को बाटोतिर लाग्नुभयो, म त्यता लाग्दिनँ।”

शर्माले अनलाइनखबरसँग भनेका छन्, “अब माओवादीको ऐतिहासिक विरासतलाई जोगाउँदै वाम–प्रगतिशील ध्रुवीकरण अभियान सुरु गर्छु।”