काठमाडौं, २७ कात्तिक — निर्वाचन आयोगले आगामी माघ ११ गतेका लागि निर्धारित राष्ट्रियसभा सदस्य निर्वाचनको तयारीका लागि राजनीतिक दलहरूसँग छलफल गरेको छ। आयोगको कार्यालय, कान्तिपथमा आयोजित छलफलमा कार्यवाहक प्रमुख निर्वाचन आयुक्त रामप्रसाद भण्डारी, अन्य आयुक्त र राष्ट्रियसभामा प्रतिनिधित्व गर्ने नेपाली कांग्रेस, एमाले, माओवादी केन्द्र लगायत दलका प्रतिनिधिहरू सहभागी थिए।

निर्वाचन आयोगका सचिव माहादेव पन्थले दलहरूसँग प्राविधिक परामर्शपछि निर्वाचन कार्यक्रम सार्वजनिक गरिने बताए। राष्ट्रियसभाका १९ सदस्यमध्ये १८ सदस्यमा निर्वाचन हुने छ भने एक सदस्य राष्ट्रपतिद्वारा मनोनित गरिनेछ।

निर्वाचक मण्डलमा प्रदेशसभा सदस्य, स्थानीय तहका अध्यक्ष/प्रमुख र उपाध्यक्ष/उपप्रमुख रहेका छन्। प्रत्येक प्रदेशसभा सदस्यको मतभार ४८ र अध्यक्ष/प्रमुख तथा उपाध्यक्ष/उपप्रमुखको मतभार १८ रहेको छ। निर्वाचन सदस्यको पदावधि सकिनु ३५ दिनअघि सम्पन्न गर्न कानुनी व्यवस्था अनुसार यो निर्वाचन आयोजना हुन लागेको हो।