नेकपा एकीकृत समाजवादीका वरिष्ठ नेता झलनाथ खनाल आज माओवादी केन्द्रका अध्यक्ष पुष्पकमल दाहाल ‘प्रचण्ड’लाई भेट्ने भएका छन्। भेटघाट गर्ने स्थल भने अहिलेसम्म टुंगो लागेको छैन।

खनालका अनुसार आफ्नी पत्नी जेन-जी आन्दोलनका क्रममा घाइते भएपछि विभिन्न दलका नेताहरूले देखाएको सद्भाव र मायाप्रति धन्यवाद प्रकट गर्न उनी भेटघाटमा लागेका हुन्।

खनालले हिजो पूर्वप्रधानमन्त्री तथा एमाले अध्यक्ष केपी शर्मा ओलीलाई भेटेर आफू र परिवारप्रति देखाइएको माया र सद्भावका लागि धन्यवाद दिएका थिए।

‘मैले नेताहरूलाई भेटेर राजनीतिक कुरा भन्दा पनि मप्रति देखाउनुभएको माया र सद्भावका लागि धन्यवाद दिन भेटेको हुँ,’ खनालले *खबरहब*सँग भने, ‘नेताहरूसँग मेरो भेट्ने क्रम जारी छ। हिजो केपी कमरेडलाई भेटेँ, आज प्रचण्ड कमरेडलाई भेट्दै छु। भोलि अन्य नेताहरूलाई पनि भेट्नेछु।’

खनालले ओलीसँगको भेटमा पनि मुख्यतः स्वास्थ्य अवस्था र पारिवारिक सम्बन्धका विषयमा कुराकानी भएको बताए।

राजनीतिक कुराकानीका क्रममा एमाले अध्यक्ष ओलीले एमालेमा प्रवेश गर्न इच्छुकहरूको हकमा समूहगत एकताभन्दा व्यक्तिगत प्रवेशमा जोड दिने बताएका खनालले जानकारी दिए।