‘कमन जेनजी नेपाल’को राष्ट्रिय भेलाले सातै प्रदेशका इन्चार्ज र संयोजक तोक्दै संगठन विस्तारका साथै नयाँ सरकार गठनको माग गरेको छ।

राष्ट्रिय अध्यक्ष विकेश साहले आइतबार जारी विज्ञप्तिमा भेलाको निर्णय सार्वजनिक गर्दै उपत्यका विशेष प्रदेशदेखि सुदूरपश्चिमसम्मका इन्चार्ज र संयोजकको जिम्मेवारी तोकिएको जानकारी दिएका हुन्। निर्णयअनुसार उपत्यका विशेष प्रदेशको इन्चार्जमा साहिल साह र संयोजकमा समृद्धि रेग्मी, कोशी प्रदेशमा सुशिल पासवान र नविन साह, मधेस प्रदेशमा रविन्द्र यादव र प्रदिप साह, बागमती प्रदेशमा विकास झा र प्रसुन्ना आचार्य, गण्डकी प्रदेशमा मुस्कान घले र रितिका परियार, लुम्बिनी प्रदेशमा विकेश यादव र पवन साह, कर्णाली प्रदेशमा प्रिन्स साह र सोनिया पटेल, र सुदूरपश्चिम प्रदेशमा दिपेन्द्र सिंह कुँवर र राजन साहलाई जिम्मेवारी तोकिएको छ।

राष्ट्रिय भेलाले अन्तरिम संविधान जारी गरी जेनजी नेतृत्वमा नयाँ सरकार गठन गर्नुपर्ने माग गरेको छ। साथै, जेनजी आन्दोलनकारीमाथिको धरपकड बन्द गर्न, हत्यारा र भ्रष्टाचारमा संलग्न व्यक्तिहरूलाई कारबाही गर्न, सुशीला कार्की नेतृत्वको सरकार तुरुन्त विघटन गर्न र गृहमन्त्री ओमप्रकाश अर्यालले राजीनामा दिनुपर्ने मागसमेत राखिएको छ। भेलाले जेनजी आन्दोलनका शहीद तथा घाइते परिवारलाई रोजगारी दिनु र घाइतेहरूको उपचारमा भइरहेको लापरवाही अन्त्य गर्नुपर्नेमा पनि जोड दिएको छ।

आफ्ना माग पूरा गराउनका लागि भेलाले देशव्यापी भण्डाफोर अभियान सञ्चालन गर्ने, जेनजी हत्यारा केपी ओली र रमेश लेखकविरुद्ध जनदबाब सिर्जना गर्ने र एक साताभित्र कारबाही नभए गृहमन्त्रीलाई ऐरियाबन्दी गर्ने चेतावनीसमेत दिएको छ। भेलाबाट भएका निर्णय र धारणा सार्वजनिक गर्ने उद्देश्यले ‘कमन जेनजी नेपाल’ले सोमबार रिपोर्टर्स क्लब, भृकुटीमण्डपमा पत्रकार सम्मेलन गर्ने जनाएको छ।