काठमाडौं । काठमाडौंको बिजुलीबजारस्थित पुलमा पेस्तोल बोकेको भिडियो सामाजिक सञ्जालमा भाइरल भएपछि प्रहरीले अनुसन्धान गरेको छ। अनुसन्धानबाट उक्त भिडियो जेनजी आन्दोलनको समयको नभएर करिब एक वर्ष पुरानो भएको पुष्टि भएको छ। साथै, पेस्तोल नक्कली रहेको पनि पाइएको छ।

भिडियोमा देखिएको ३० वर्षीय तेन्जेन दावाले नक्कली पेस्तोल बोकेको बताएका छन्। उनी टिओबी समूहका सदस्य हुन् र कालो ज्याकेटमा ‘टिओबी’ लेखिएको थियो। प्रहरीले उनलाई सोधपुछ गर्दै सामाजिक सञ्जालमा ध्यानाकर्षण गर्न भिडियो सार्वजनिक गरेको दाबी गरेको छ।

तेन्जेनले फ्रि तिब्बतका एजेन्ट नभएको र आफ्नो पुर्खा तिब्बतीयन मूलका भएको बताएका छन्। उनका परिवारका सदस्यहरू भारतमा बस्छन् भने उनको बाबु भारतीय सेनाबाट अवकाशित थिए। तेन्जेनले पछिल्लो समयमा गाँजा सेवन गरेको समेत स्वीकार गरेका छन्।

प्रहरीले उनलाई अभद्र व्यवहारको कसुरमा थप अनुसन्धानका लागि म्याद लिने तयारी गरिरहेको छ। हालसम्म पेस्तोल बाहेक आगजनी, तोडफोड वा लुटपाटमा संलग्नता प्रमाण फेला नपरेको छ।

यस विषयमा टिओबी समूह र आन्दोलनसँगको सम्बन्धबारे समेत अनुसन्धान जारी छ। प्रहरीले अन्य सदस्यहरूको पनि छानबिन गरिरहेको जनाएको छ।