नेकपा एमालेको केन्द्रीय कमिटी बैठक असोज २७ र २८ गते काठमाडौँमा बस्दैछ । केन्द्रीय कमिटी बैठकका एजेन्डा तय गर्न असोज १९ र २० गते सचिवालय बैठक बोलाइएको छ ।

भदौ २३ र २४ मा भएको जेनजी आन्दोलनपछि सत्ताच्युत हुन पुगेको एमाले र सो पार्टीका अध्यक्ष केपी ओलीले असोज १२ गते पहिलो पटक सचिवालय बैठक बोलाएका थिए ।

सोही बैठकले केन्द्रीय कमिटी बैठकको मिति तय गर्दै उक्त बैठकमा छलफल गर्ने एजेन्डा तय गर्न दशैकै(असोज १९ र २० ) मा सचिवालय बैठक बोलाएको हो ।

उपमहासचिव एवं प्रवक्ता प्रदीप ज्ञवालीका अनुसार केन्द्रीय कमिटीका एजेन्डा तय गर्न असोज १९ र २० गते सचिवालयको बैठक डाकिएको छ । उनका अनुसार सम्भवतः केन्द्रीय कमिटी बैठकले ११ राष्ट्रिय महाधिवेशनको मिति समेत तोक्नेछ ।

‘सम्भवतः हामी चाँडै राष्ट्रिय महाधिवेशन गर्दैछौं । केन्द्रीय कमिटीले यस विषयमा निर्णय लिन सक्छ’ ज्ञवालीको भनाइ छ । जेनजी आन्दोलनपछि एमालेमा ओलीले नेतृत्व छाड्नुपर्ने माग बढ्दो छ । तर ओली नेतृत्व त्यतिकै नछाड्ने बरु महाधिवेशन फेस गर्ने तयारीमा लागेको बुझिएको छ ।