काठमाडौँ, असोज ३० — नेकपा एमालेका सचिव योगेश भट्टराईले पार्टी अध्यक्ष केपी शर्मा ओलीलाई पार्टी पुनर्गठनको प्रक्रिया अन्तर्गत सहज रूपमा नेतृत्व हस्तान्तरण गर्न सुझाव दिएका छन्।

पार्टीको १० औँ केन्द्रीय कमिटी बैठकमा ‘आजको सङ्कट र पार्टी पुनर्गठन’ विषयमा धारणा राख्दै भट्टराईले नेतृत्व हस्तान्तरणलाई पार्टी पुनर्गठनको एक महत्त्वपूर्ण आयामको रूपमा औंल्याए।

“पार्टी पुनर्गठनको महत्त्वपूर्ण आयाम नेतृत्वको हस्तान्तरण हो,” भट्टराईले भने, “विधान महाधिवेशनमार्फत वर्तमान अध्यक्ष केपी शर्मा ओलीलाई पुनः अध्यक्ष बनाउने मनोवैज्ञानिक सन्देश प्रवाह भए पनि, देशको असाधारण परिस्थिति र जनअपेक्षालाई ध्यानमा राखी ती मनोविज्ञानमाथि पुनर्विचार आवश्यक छ।”

भट्टराईले अध्यक्ष ओलीलाई नेतृत्व हस्तान्तरणका लागि दुई वैकल्पिक मार्ग प्रस्ताव गरेका छन्।

पहिलो विकल्प अन्तर्गत, अध्यक्ष ओलीले पार्टीका वरिष्ठतम् नेतालाई तत्काल कार्यवाहकको जिम्मेवारी दिने र आगामी महाधिवेशनबाट सहमति वा प्रतिस्पर्धाको माध्यमबाट नयाँ नेतृत्व चयन गर्ने सुझाव दिएका छन्। उनले नयाँ नेतृत्वको वरिपरि पार्टीलाई गोलबन्द र एकताबद्ध गर्नुपर्ने उल्लेख गरे।

दोस्रो विकल्प अनुसार, अध्यक्ष ओलीकै नेतृत्वमा महाधिवेशन सम्पन्न गर्ने तर त्यसअघि नेतृत्व हस्तान्तरणको पूर्वघोषणा गर्ने प्रस्ताव पनि भट्टराईले अघि सारेका छन्।

यीमध्ये कुन विकल्प रोज्ने भन्ने निर्णय अध्यक्ष कमरेडको अन्तरआत्मामा छोड्नुपर्छ, भट्टराईको लिखित धारणा उल्लेख गर्छ।

पार्टी भित्र सहमति, एकता र समय सापेक्ष नेतृत्व परिर्वतनको माग बढ्दो अवस्थामा रहेका बेला भट्टराईको यो प्रस्तावलाई महत्वपूर्ण रूपमा हेरिएको छ।