भक्तपुरमा युवकमाथि कुटपिट गरेको आरोपमा प्रहरीले ६ जनालाई पक्राउ गरेको छ।

भक्तपुर नगरपालिका-१० कमलपोखरीस्थित पाटीमा बसिरहेका एक जना पुरूषमाथि कुटपिट गरेको आरोपमा प्रहरीले ६ जनालाई पक्राउ गरेको हो।

मंसिर ३० गते सूर्यविनायक नगरपालिका-१० चित्तापोल बस्ने २७ वर्षीय रन्जित कार्कीलाई कुटपिट र इँटा प्रहार गरी घाइते बनाएको काठमाडौं उपत्यका अपराध अनुसन्धान कार्यालयका एसपी काजीकुमार आचार्यले जानकारी दिए।

कार्कीलाई कुटपिट गरी अचेत अवस्थामा छाडेर फरार भएका थिए। फरार भएका ६ जनालाई कार्यालय र भक्तपुरको टोलीले सोमबार पक्राउ गरेको हो।

पक्राउ पर्नेहरू चाँगुनारायण नगरपालिका-६ खरिपाटी बस्ने १८ वर्षीय समिर नेपाली, भक्तपुर-१० कमलपोखरी बस्ने १८ वर्षीय आशिख सिजखो, बाराका १८ वर्षीय सुमन तामाङ र सिन्धुलीका १८ वर्षीय अशोक तामाङ छन्।

दुई जना नाबालक रहेको प्रहरीले जनाएको छ। थप अनुसन्धानका लागि उनीहरूलाई प्रहरी वृत्त जगातीमा पठाइएको छ।