काठमाडौँ ।  लुम्बिनी प्रदेश सरकारले आइतबार ४ सदस्यीय मन्त्रिपरिषद गठन गरेको छ । 

गत शुक्रबार मुख्यमन्त्रीमा नियुक्त हुनु भएका जोखबहादुर महराले प्रदेश प्रमुखको कार्यालय बुटवलमा शपथ लिएपछि ३ जनालाई मन्त्री नियुक्त गरेसँगै पहिलो चरणमा ४ सदस्यीय मन्त्रिपरिषद बनेको हो । नवनियुक्त मन्त्रीहरुमा नेकपा एमालेबाट चेतनारायण आचार्य, नेकपा माओवादी केन्द्रबाट दीपेन्द्र पुन र जनता समाजवादी पार्टीबाट भण्डारीलाल अहिर रहेका छन् । अर्घाखांचीका आचार्य एमाले संसदीय दलका उपनेता हुनुहु्न्छ ।

रोल्पाका पुन गत चुनावमा स्वतन्त्र उम्मेदवार बनेर नेपाली कांग्रेस र माओवादीका साझा उम्मेदवार कांग्रेस प्रदेश सभापति अमरसिंह पुनलाई पराजित गर्नुभएको थियो। उँँहा गत चुनावमा पनि प्रदेश सांसद चुनिनु भएको थियो । बाँकेका अहिर यसअघिको सरकारमा समेत कृषि तथा भूमि व्यवस्था मन्त्री हुनुभएको थियो ।

बाँकी मन्त्रीहरु मुख्यमन्त्री महराले विश्वासको मत लिएपछि नियुक्त गरिने मुख्यमन्त्रीको सचिवालयले जनाएको छ । केन्द्रीय सत्ता समीकरण परिवर्तन भएका कारण लुम्बिनी प्रदेशका मुख्यमन्त्री डिल्लीबहादुर चौधरीले राजीनामा दिएपछि ५ राजनीतिक दलका ४७ र एक स्वतन्त्र सांसद गरी ४८ जना प्रदेश सभा सदस्यको समर्थनमा माओवादी संसदीय दलका नेता महरा मुख्यमन्त्रीमा नियुक्त भएको हो ।

सोही प्रदेशमा एक सिट मात्र भएको नेकपा एकीकृत समाजवादी पार्टी र स्वतन्त्र सांसद खड्ग बस्नेतलाई समेत मन्त्री बनाउनेगरी दलहरूकोबीचमा लिखित सहमति भएको छ । जनता समाजबादी पार्टीलाई कृषि तथा भूमि व्यवस्था मन्त्रालयसहित सहरी विकास तथा पर्यटन मन्त्रालयको नेतृत्व दिनेसम्मको सहमति भएको हो ।

त्यस्तै मुख्यमन्त्री बनाउन समर्थन गर्ने नागरिक उन्मुक्ति पार्टीलाई पनि सरकारमा सहभागी गराउन मन्त्रालय दिने योजना पनि रहेको छ । धेरै दल सरकारमा सहभागी हुने हुँदा यसअघि कायम १० मन्त्रालय फुटालेर बढाउने तयारी भएको मुख्यमन्त्रीको सविचालयले जनाएको हो ।