प्रधानमन्त्री पुष्पकमल दाहाल ‘प्रचण्ड’ ले पहिले अमेरिका र त्यसलगत्तै छिमेकी राष्ट्र चीनको भ्रमण गर्ने भएका छन् । संयुक्त महासभामा सम्बोधन गर्ने समय साटफेर हुने भएपछि प्रधानमन्त्रीले एकैपटक दुई देशको भ्रमण गर्ने तालिका तय भएको हो ।

चीनमा २३ सेप्टेम्बरदेखि एसियाली खेलकुद सुरु हुँदैछ । त्यसको उद्घाटन कार्यक्रममा सहभागी हुने गरी प्रधानमन्त्री प्रचण्डलाई चीनले निम्ता दिएको थियो । तर, त्यही समयमा अमेरिकाको न्यूयोर्कमा संयुक्त महासभामा पनि भाग लिन जाने कार्यक्रम तय भएकाले प्रधानमन्त्रीलाई पहिले कहाँ जाने भन्ने बारेमा सकस भएको थियो ।

दुवै देशको भ्रमण तालिकालाई समायोजन गर्नका लागि महासभामा प्रधानमन्त्री प्रचण्डको सम्बोधनको मिति सार्नका लागि परराष्ट्र मन्त्रालयले गृहकार्य सुरु गरेको थियो । यस विषयमा साउन १८ गते प्रधानमन्त्री प्रचण्डले नेपालका लागि अमेरिकी राजदूत डिन थम्सनसँग छलफल समेत गरेका थिए । 

‘अहिले मलेसियाले आफ्नो सम्बोधनको समय हामीसँग साटफेर गर्न तयार भएको छ,’ बालुवाटार स्रोतले भन्यो, ‘प्रधानमन्त्रीले अब सेप्टेम्बर १८ मा महासभालाई सम्बोधन गर्ने तय भएको छ ।’ यसअघि प्रधामन्त्रीले सेप्टेम्बर २२ मा सम्बोधन गर्ने कार्यतालिका रहेको थियो ।

बालुवाटार स्रोतका अनुसार प्रधानमन्त्री सेप्टेम्बर १८ मा सम्बोधन सकेर केहीदिन त्यहाँ उच्च स्तरीय भेटघाट गर्नेछन् । त्यसपछि त्यहाँबाट प्रधानमन्त्री एसियाली खेलकुदको उद्घाटन समारोहलाई भ्याउने गरी अमेरिकाबाट सिधै चीनतर्फ प्रस्थान गर्ने तयारी गरेका छन् । यसबारे अन्तिम निर्णय हुन भने बाँकी रहेको छ ।

प्रधानमन्त्री प्रचण्डलाई आफ्नो देशको भ्रमण गराउन चीनले सुरुदेखि नै प्रयास गर्दै आइरहेको छ । तर, प्रधानमन्त्रीले आफ्नो पहिलो भ्रमण भारतबाट सुरु गरे ।

२०७९ चैतमा चीनको हेनान प्रान्तमा आयोजना भएको एसियाली विकास मञ्च (बोआओ) को बैठकमा अतिथिको रूपमा प्रधानमन्त्री प्रचण्डलाई निमन्त्रणा गरिएको थियो । तर, प्रधानमन्त्री प्रचण्ड भारतलाई प्राथमिकतामा राखेका थिए । यसैबीच उनी खाद्य सुरक्षा कार्यक्रममा इटालीको भ्रमणमा गएर आइसकेका छन् ।