पाकिस्तानी प्रधानमन्त्री खानविरूद्ध संसदमा पेस भएको अविश्वासको प्रस्तावमाथि आज मतदान
पाकिस्तानका प्रधानमन्त्री इमरान खानविरूद्ध संसदमा पेस भएको अविश्वासको प्रस्तावमाथि आइतबार मतदान हुँदैछ।
उनीविरूद्ध ल्याइएको अविश्वासको प्रस्ताव पारित भए प्रधानमन्त्री खान पदमुक्त हुनेछन्।
पाकिस्तानको तल्लो सदन नेसनल एसेम्ब्लीमा गत साता खानको पाकिस्तान तेहरिक–इ–इन्साफ (पीटीआई) ले बहुमत गुमाएको थियो। गठबन्धनका केही सांसदहरु सरकारको विपक्षमा उभिएका थिए। त्यस्तै पीटीआईकै सांसदहरूले पनि खानविरुद्ध विद्रोह गरेका थिए ।
३४२ सदस्यीय नेसनल एसेम्ब्लीमा बहुमतका लागि १७२ सांसद चाहिन्छन्। बुधबार सत्तारूढ मुत्ताहिद्दा क्वामी मुभमेन्ट-पाकिस्तानले विपक्षीलाई साथ दिने निर्णय गरेपछि अब सत्तारूढ गठबन्धनसँग १६४ सांसदमात्रै बाँकी रहेका छन्।
विपक्षीहरूसँग १७७ सांसद पुगेका छन्। खानको आफ्नै पार्टीभित्र पनि विवाद छ। उनलाई समर्थन नगर्ने सांसदको संख्या २५ देखि ४० जना रहेको बताइन्छ।
