रूसले आक्रमण गरेको युक्रेनमा एक जना भारतीय विद्यार्थी मारिएका छन्।

भारतीय विदेश मन्त्रालयका प्रवक्ता अरिन्दम बाग्चीले सामाजिक सञ्जाल ट्विटरमा युक्रेनको दोस्रो ठूलो सहर खार्किभमा मंगलबार बिहान एक भारतीय विद्यार्थी मारिएको जानकारी दिएका छन्।

ती विद्यार्थी गोली लागेको जनाइएको छ। उनीमाथि कसले गोली हानेको भन्ने खुलेको छैन।

युक्रेनमा २० हजार बढी मेडिकल विद्यार्थी रहेको अनुमान छ। तीमध्ये पाँच हजार जति युक्रेनबाट बाहिरएको बताइएको छ।

रूसले फागुन १२ गते युक्रेनमाथि आक्रमण घोषणा गरेको थियो।

भारतले अहिलेसम्म रूसले युक्रेनमाथि गरेको आक्रमणको विरोध गरेको छैन। यो बीचमा भारतीय प्रधानमन्त्री नरेन्द्र मोदीले रूसी राष्ट्रपति भ्लादिमिर पुटिनसँग टेलिफोनमा कुरा गरेका भए पनि उनले दुबै पक्षलाई संयमता अपनाउन मात्रै भनेका छन्।