(काठमाडौं) नेपाली बजारमा सुनको बढ्दो भाउले ऐतिहासिक रेकर्ड बनाएको छ । बुधबारका लागि छापावल सुनको मूल्य प्रतितोला ७७ हजार १ सय र तेजाबी सुनको ७६ हजार ८ सय खरिद बिक्री मूल्य तोकिएको नेपाल सुनचँँदी व्यवसायी महासंघले जनाएको छ ।

मंगलबारको तुलनामा छापावल र तेजाबी सुनको मूल्य तोलामा ४ सय रुपैयाँ र चाँदीको मूल्य पनि तोलामा ४२ रुपैयाँले बढेको महासंघले जनाएको छ ।

मंगलबार छापावल सुनको मूल्य प्रतितोला ७६ हजार ७ सय र तेजावी सुनको मूल्य ७६ हजार ४ सयमा कारोबार खुलेको थियो ।

यस्तै चाँदी प्रतितोला ७ सय ७३ रुपैयाँमा कारोबार भएको थियो । मंगलबारको सुनको मूल्य पनि त्यस अघि कारोबार भएको मध्ये सबै भन्दा धेरै भएको महासंघका वरिष्ठ उपाध्यक्ष मणिकरत्न शाक्यले बताए ।

मूल्य बढ्नुको कारण कोरोना भाइरस

कोरोना भाईरसका कारण विश्व अर्थतन्त्र सुस्ताउँदा त्यसको असर चौतर्फी देखिएको सुन व्यवसायीहरुले बताएका छन् । कोरोनाका कारण अन्तराष्ट्रिय शेयर बजार सुताएको र मानिसहले सुनमा लगानी गर्न खोज्दा भाउ आकासिएको व्यवसायी मणिकरत्न शाक्यले बताए । łविश्व बजारमा सुनको उत्पादन यथावत छ तर सुन किन्ने मानिसहरु बढे मूल्य बढ्यो ।’ उपाध्यक्ष शाक्यले भने । अन्तराष्ट्रिय बजारमा सुनको मूल्य १६ यस डलर नाघेको उनले बताए ।