काठमाडौं काठमाडौंबाट बझाङका लागि छुटेको सुदूरपश्चिम यातायातको साइपाल डिलक्स बस बर्दियाको रम्भापुर नजिक आज बिहान दुर्घटनामा परेको छ ।
दुर्घटनामा ३० जना बढी यात्रु घाइते भएका छन् । घाइतेमध्ये पाँच जनाको अवस्था गम्भीर छ । घाइतेको कोहलपुर मेडिकल कलेजमा उपचार भइरहेको छ ।
काठमाडौंबाट शनिबार बिहान ११ः३० बजे बझाङका लागि छुटेको ना६ख १३३९ नम्बरको बस बर्दियाको रम्भापुरमा आज बिहान ४ बजे दुर्घटना भएको सोही बसमा रहेका बझाङका राज बुढाले बताए ।
बुढाका अनुसार बस चालक सिकारु भएकाले दुर्घटना भएको हो । घाइतेहरुलाई नेपाल प्रहरी र नेपाली सेनाले उद्धार गरी अस्पताल पुर्याएको हो ।
काठमाडौंबाट बिहान ११ः ३० बजे हिँडेको बस करिब भोलिपल्ट बेलुकी ४ बजे बझाङको सिमखेत बसपार्क पुग्ने गर्दछ ।
यसअघि पनि सोही बस नवलपरासीमा दुर्घटनामा परेको थियो । ३ जेठ २०७३ मा सो बस पूर्व–पश्चिम राजमार्गअन्तर्गत नवलपरासीको गैंडाकोटमा रोकिराखेको लु१ख ७७६८ नम्बरको ट्रकमा ठोक्किँदा २० यात्रु घाइते भएका थिए ।