काठमाडौं, १५ असार  प्रधानमन्त्री केपी शर्मा ओलीले विकासका लागि सरकार प्रतिपक्षसँग सहकार्य गर्न तयार रहेको दाबी गरेका  छन् । राष्ट्रिय श्रम तथा रोजगार सम्मेलनको आज उद्घाटन गर्दै ओलीले सो सहकार्य गर्न तयार रहेको बताएका हुन् ।
प्रधानमन्त्री ओलीले सत्ता–प्रतिपक्ष भनेको आवधिक मात्र भएको भन्दै भने, ‘सत्ता प्रतिपक्ष भनेको आवधिक कुरा हुन् , विकास र समृद्धि सबैको आवश्यकता हो , देश विकासका लागि सरकार प्रतिपक्षसँग मिलेर काम गर्ने उत्कट अभिलासामा छ ।’
प्रधानमन्त्री ओलीले भावी सन्ततिले अहिले जस्तो गरिबीको सामना गर्नु पर्ने स्थितिको अन्त्य गर्नुपर्ने समेत बताए उनले भने, ‘भावी सन्ततिलाई पनि यही गरिबीको स्थिती कायम राख्ने होइन । बेरोजगारी कै अवस्थामा राख्ने होइन । मेरो कार्यकाल टुंगिदा बेरोजगारीको अवस्थामा परिवर्तन ल्याउछु ।’
प्रधानमन्त्री ओलीले देशमा काम गर्ने सक्ने जनसंख्याको बाहुल्यता भएकोले यो अवसरको सदुपयोग गर्नुपर्ने बताए । नेपाल काम गर्न चाहने कर्मबवीरहरुको देश भएको उल्लेख गर्दै प्रधानमन्त्री ओलीले भने, ‘नेपाल श्रम गर्न नहिचकिचाउनेहरुको देश हो । नेपालीहरु श्रम गर्नमा रुचि राख्छन् तर यहाँ काम नपाएर ठुलो संख्यामा नेपालीहरु विदेशमा श्रम गर्न गइरहेका छन् ।’
कामका लागि विदेश जानु पर्ने अवस्थाको चाँडै अन्त्य हुने प्रधानमन्त्री ओलीले बताए । ‘हामी स्वदेश मै आकर्षक रोजगारीको सृजना गर्छौं । आधुनिकीकरण र औद्योगीकिकरण जति बढाउदछौं त्यती नै रोजगारीको सृजना हुन्छ । यो अवस्था सृजना गर्न सरकार लागि परेको दाबि गरेकाछन ।