नेपाल राष्ट्र बैंकले विभिन्न पदमा ६१ कर्मचारी भर्नाका लागि खुला प्रतियोगितात्मक परीक्षामार्फत दरखास्त आह्वान गरेको छ ।

बैंकको केन्द्रीय कार्यालय, मानव संसाधन व्यवस्थापन विभागले बिहीबार सूचना जारी गर्दै सहायक निर्देशक र सहायक पदमा आवेदन खुलाएको हो ।

सूचनाअनुसार सहायक निर्देशक (अधिकृत तृतीय) प्रशासनतर्फ २६, लेखा तथा लेखापरीक्षणतर्फ तीन, वाणिज्य कानुनतर्फ दुई र सूचना प्रविधितर्फ चार पदमा कर्मचारी माग गरिएको छ । त्यस्तै, सहायक (सहायक द्वितीय) प्रशासनतर्फ २६ पदका लागि दरखास्त आह्वान गरिएको छ । कुल ६१ पदमध्ये समावेशी समूहका लागि समेत पद छुट्याइएको छ ।

बैंकले योग्य नेपाली नागरिकबाट कात्तिक २७ गतेदेखि अनलाइन आवेदन माग गरेको छ । इच्छुक उम्मेदवारले तोकिएको दस्तुरसहित मङ्सिर १७ गतेसम्म आवेदन दिन सक्नेछन् । दोब्बर दस्तुर तिरेर मङ्सिर २४ गतेसम्म आवेदन दिन सकिने सूचनामा उल्लेख छ ।

आवेदनका साथ नेपाली नागरिकताको प्रमाणपत्र, शैक्षिक योग्यताको प्रमाणपत्र तथा ट्रान्सक्रिप्ट, चारित्रिक प्रमाणपत्रलगायत आवश्यक कागजात पेस गर्नुपर्नेछ । विदेशी विश्वविद्यालयबाट शैक्षिक योग्यता हासिल गरेका उम्मेदवारले समकक्षता निर्धारण गरिएको प्रमाणपत्रसमेत पेस गर्नुपर्नेछ ।

त्यस्तै, सहायक पदका लागि लोक सेवा आयोगबाट एकीकृत परीक्षा प्रणालीअन्तर्गत सञ्चालित पूर्वयोग्यता परीक्षा उत्तीर्ण गरेको प्रमाणपत्र आवश्यक पर्ने बैंकले जनाएको छ ।