अफगानिस्तानमा तालिबानले महिलामाथिका प्रतिबन्ध थप कडा बनाउँदै पुरुष चिकित्सक र दन्त चिकित्सकलाई महिला बिरामीको उपचार गर्न अनौपचारिक रूपमा रोक लगाएको छ । आकस्मिक अवस्थामा समेत महिलासँग पुरुष अभिभावक (महरम) अनिवार्य गरिएको छ ।

द गार्जियन र जान टाइम्सको संयुक्त प्रतिवेदनअनुसार, औपचारिक घोषणा नगरी अस्पताल तथा निजी क्लिनिकमा यस्तो प्रतिबन्ध कार्यान्वयन भइरहेको छ । यसका कारण धेरै महिला आधारभूत स्वास्थ्य सेवाबाट समेत वञ्चित भएका छन् ।

प्रतिवेदनमा हेरातकी ३७ वर्षीया एक महिलाको उदाहरण दिइएको छ । दाँतको उपचारका लागि अग्रिम रकम बुझाएकी उनलाई पुरुष दन्त चिकित्सकले महिलाको उपचार गर्न नपाउने भन्दै क्लिनिकले फर्काएको थियो । तीन महिना बितिसक्दा पनि उनको उपचार पूरा हुन सकेको छैन ।

यसअघि उत्तरी बल्ख प्रान्तमा महिला बिरामीलाई वास्तविक नामबाट नबोलाउन र औषधिको पुर्जामा नामको सट्टा ‘श्रीमती’ लेख्नसमेत निर्देशन दिइएको प्रतिवेदनमा उल्लेख छ ।

तालिबानका यस्ता प्रतिबन्धले अफगानिस्तानमा महिलाको स्वास्थ्य सेवामा पहुँच थप कठिन बनाएको छ ।