धनुषाको मिथिला बिहारी नगरपालिका–३, मथिलेश्वरमा श्रीमान्–श्रीमती मृतावस्थामा फेला परेका छन्। घटनामा उनीहरूका चार वर्षीय छोरा पनि घाइते भएका छन्।

माइतीघरमा बस्दै आएकी ३० वर्षीया रीना देवी यादवको घाँटीमा धारिलो हतियार प्रहार भएको घाउ देखिएको प्रहरीले जनाएको छ। उनको हत्या भएको हुनसक्ने प्रहरीको प्रारम्भिक आशङ्का छ।

उनका श्रीमान् ३५ वर्षीय उमेश यादव घरदेखि करिब एक किलोमिटर टाढा रूखमा झुण्डिएको अवस्थामा आज बिहान मृत फेला परेका हुन्। जिल्ला प्रहरी कार्यालय धनुषाका प्रवक्ता प्रहरी नायब उपरीक्षक ओमप्रकाश खनालले घटनाबारे जानकारी दिएका हुन्।

मिथिला बिहारी नगरपालिका–४, भरतपुर निवासी उमेश केही दिनअघि मात्रै वैदेशिक रोजगारीबाट घर फर्किएका थिए। उनी घटनाको अघिल्लो दिन मात्रै ससुराली पुगेका थिए।

प्रहरीका अनुसार मृतक दम्पतीका चार वर्षीय छोराको एउटा तिघ्रामा पनि धारिलो हतियार प्रहार भएको घाउ देखिएको छ। घाइते बालकको अवस्थाबारे भने थप विवरण सार्वजनिक भएको छैन।

प्रहरी नायब उपरीक्षक खनालले घटनाको प्रकृति शङ्कास्पद देखिएको बताएका छन्। श्रीमतीको हत्या गरेपछि उमेशले आत्महत्या गरेको हुनसक्ने प्रहरीको प्रारम्भिक अनुमान छ। यद्यपि, घटनाको वास्तविक कारण र घटनाक्रम पुष्टि हुन बाँकी छ। प्रहरी टोली घटनास्थलमा पुगेर अनुसन्धान गरिरहेको जिल्ला प्रहरी कार्यालय धनुषाले जनाएको छ।