लुम्बिनी प्रदेश सरकारले सङ्घीयता कार्यान्वयन भएयता बाँके जिल्लामा १५ वटा पक्की पुल निर्माण सम्पन्न गरेको छ। पुल निर्माणसँगै ग्रामीण तथा दुर्गम क्षेत्रका हजारौँ स्थानीयवासीको आवागमन सहज भएको प्रदेश भौतिक पूर्वाधार मन्त्रालयअन्तर्गतको सडक पूर्वाधार विकास कार्यालय, बाँकेले जनाएको छ।

कार्यालय प्रमुख चन्द्रबहादुर शाहका अनुसार निर्माण सम्पन्न भएका पुलबाहेक थप दुई वटा पुल निर्माणको अन्तिम चरणमा छन्। त्यस्तै, दुई वटा पुल निर्माणका लागि बहुवर्षीय ठेक्कासमेत आह्वान भइसकेको छ।

हाल बैजनाथ गाउँपालिका–६ स्थित जेठी नाला र कोहलपुर नगरपालिका–१३ स्थित गेरुवा खोलामा पुल निर्माण भइरहेको शाहले जानकारी दिए।

प्रदेश सरकारले स्थानीय आवश्यकता र मागका आधारमा पुल निर्माणलाई प्राथमिकतामा राख्दै आएको उनको भनाइ छ। ‘स्थानीयको आवश्यकता र मागलाई आधार बनाएर पुल निर्माणका योजना छनोट गरी कार्यान्वयन गरिरहेका छौँ,’ शाहले भने, ‘पुल निर्माण सम्पन्न भएपछि वर्षायाममा समेत आवागमनमा सहजता भएको छ।’

कार्यालयका अनुसार डुडुवा नाला, जेठी नाला, किरण नाला, गौरी नाला, गेरुवा नाला, गडगैचा नाला, गन्धैला नाला, दोन्द्रा नाला र रोहिणी खोलालगायतका स्थानमा पक्की पुल निर्माण भएका छन्।

जेठी नालाअन्तर्गत चार वटा पुल निर्माण सम्पन्न भइसकेका छन् भने सोही क्षेत्रमा एचगाउँमा अर्को पक्की पुल निर्माणाधीन अवस्थामा रहेको कार्यालयले जनाएको छ।

यस अवधिमा खजुरा गाउँपालिका–२ को सिगाउँस, खजुरा–४ को चल्तुवा–सिर्जनाटोल तथा साइगाउँमा समेत पक्की पुल निर्माण गरिएको छ।

लुम्बिनी प्रदेशका भौतिक पूर्वाधार विकासमन्त्री रत्न खत्रीले प्रदेश सरकार गठनपछि पुल निर्माणको क्षेत्रमा उल्लेख्य प्रगति भएको बताए। प्रदेशका विभिन्न जिल्लामा दर्जनौँ पुल निर्माण भएपछि नागरिकको आवागमन तथा यातायात सञ्चालनमा सहजता आएको उनको भनाइ छ।

‘पुल निर्माणसँगै नागरिकको आवागमन र सवारीसाधन सञ्चालनमा सहजता भएको छ,’ मन्त्री खत्रीले भने, ‘प्रदेश सरकारले पुलसँगै सडक पूर्वाधार निर्माणलाई पनि प्राथमिकतामा राखेर काम गरिरहेको छ।’