पोखरा — रसुवाको भोटेकोशी नदीमा गत बुधबार आएको बाढीमा परी मृत्यु भएका तर हालसम्म पहिचान हुन नसकेका शव कानुनी तथा वैज्ञानिक प्रक्रिया पूरा गरी जमिनमुनि व्यवस्थापन गरिने भएको छ।

नवलपुर, धादिङ, तनहुँ र गोरखाबाट पोखरा ल्याइएका १०२ शवमध्ये सोमबारसम्म १६ शवको पहिचान गरी आफन्तलाई बुझाइएको कास्कीका प्रमुख जिल्ला अधिकारी कुमानसिंह गुरुङले जानकारी दिए।

उनका अनुसार पहिचान हुन नसकेका बाँकी शवको डीएनए नमुना संकलनलगायत आवश्यक कानुनी तथा वैज्ञानिक प्रक्रिया पूरा गरेपछि मात्र व्यवस्थापन गरिनेछ।

‘शव पहिचान गरी आफन्तलाई बुझाउन नसकिएका बाँकी शवलाई जमिनमुनि व्यवस्थापन गर्छौं,’ प्रजिअ गुरुङले भने, ‘डीएनए नमुना सङ्कलनसहित सम्पूर्ण कानुनी र वैज्ञानिक प्रक्रिया पूरा गरेर मात्र शव व्यवस्थापनको काम हुन्छ।’

उनका अनुसार शव व्यवस्थापनपछि डीएनए परीक्षणबाट पहिचान खुलेमा पुनः शव पहिचान गरी आफन्तलाई बुझाउन सकिने गरी आवश्यक प्रक्रिया अपनाइनेछ।

पहिचान हुन नसकेका शवलाई पहिचान हुन नसकेका तथा बेवारिसे शव व्यवस्थापन निर्देशिकाअनुसार व्यवस्थापन गरिने प्रशासनले जनाएको छ। शव व्यवस्थापनका लागि सम्भावित स्थलको खोजी तथा आवश्यक व्यवस्थापकीय र प्राविधिक तयारीसमेत पूरा भइसकेको प्रजिअ गुरुङले बताए।

अस्पतालमा राखिएका सबै शवको परीक्षण सम्पन्न भइसकेको जनाइएको छ। शव पहिचानका लागि तस्बिर स्क्रिनमा देखाएर आफन्तलाई पहिचान गर्न सक्ने व्यवस्था मिलाइएको छ। अस्पताल परिसरमै शव पहिचानका लागि सहायता कक्षसमेत स्थापना गरिएको छ।

शवको खोजीमा विभिन्न स्थानबाट आएका आफन्तका लागि खाना तथा बासको व्यवस्थासमेत मिलाइएको प्रशासनले जनाएको छ।

बाढीले शव विभिन्न जिल्लामा पुर्‍याएकाले पहिचानको काम थप जटिल बनेको छ। कतिपय शव क्षतविक्षत अवस्थामा फेला परेकाले प्रत्यक्ष रूपमा पहिचान गर्न कठिनाइ भइरहेको जनाइएको छ।

नवलपुरबाट ४१, धादिङबाट २७, तनहुँबाट २३ र गोरखाबाट ११ गरी कुल १०२ शव पहिचान तथा परीक्षणका लागि पोखरा ल्याइएको थियो। ती शव पोखरा स्वास्थ्य विज्ञान प्रतिष्ठान र मणिपाल शिक्षण अस्पतालमा राखिएका छन्।