त्रिभुवन विमानस्थलबाट ४२२ ग्राम सुनजस्तो देखिने धातुसहित भारतीय नागरिक पक्राउ
त्रिभुवन अन्तर्राष्ट्रिय विमानस्थलबाट ४२२.५ ग्राम सुनजस्तो देखिने पहेँलो धातुसहित एक भारतीय नागरिक पक्राउ परेका छन्।
मुम्बईबाट इन्डिगो एयरको उडानमार्फत काठमाडौं आएका भारतको दिल्लीका करिब ४६ वर्षीय असलम शोकतलाई विमानस्थल परिसरमा अस्वाभाविक रूपमा हिँडडुल गरिरहेको अवस्थामा प्रहरीले नियन्त्रणमा लिएको हो।
शङ्का लागेपछि प्रहरीले चेकजाँच गर्दा उनले लगाएको अन्डरवेयरभित्र प्लास्टिकले बेरेर लुकाइछिपाइ राखिएको अवस्थामा सुनजस्तो देखिने पहेँलो धातु फेला पारेको जनाएको छ।
अवैध रूपमा उक्त पदार्थ नेपाल भित्र्याउन खोजेको आरोपमा पक्राउ परेका शोकतलाई थप अनुसन्धान तथा आवश्यक कारबाहीका लागि प्रहरी वृत्त गौशाला पठाइएको छ।
बरामद भएको धातु सुन नै हो वा होइन भन्नेबारे आवश्यक परीक्षण तथा अनुसन्धानबाट थप स्पष्ट हुने प्रहरीले जनाएको छ।
