उज्यालो नेपाल पार्टीका अध्यक्ष कुलमान घिसिङले प्रधानमन्त्री बालेन्द्र शाहसँग भेटवार्ता गर्दै बाढी तथा पहिरोका कारण अवरुद्ध विद्युत् सेवा र प्रभावित जलविद्युत् आयोजनालाई यथाशीघ्र सञ्चालनमा ल्याउने विषयमा छलफल गरेका छन्।

भेटवार्तामा बाढीपहिरो प्रभावित क्षेत्रमा अवरुद्ध विद्युत् सेवा छिटो पुनः सञ्चालन गर्ने उपाय, निर्माणाधीन जलविद्युत् आयोजनाको काम तीव्र बनाउन आवश्यक प्रोत्साहन दिने तथा प्रभावित आयोजनाका लागि विशेष प्याकेज घोषणा गर्ने विषयमा छलफल भएको घिसिङले जानकारी दिए।

उनका अनुसार बाढीपहिरोका कारण हाल सञ्चालनमा रहेका २३५ मेगावाट क्षमताका जलविद्युत् आयोजना प्रभावित भएका छन्। ती आयोजनालाई छिटो सञ्चालनमा ल्याउन सरकारले आवश्यक पहल गर्नुपर्ने सुझाव आफूले प्रधानमन्त्रीसमक्ष राखेको उनले बताए।

घिसिङले निर्माणाधीन आयोजनालाई समेत आवश्यक ‘इन्सेन्टिभ’ उपलब्ध गराएर निर्माण कार्य तीव्र बनाउनुपर्नेमा जोड दिएका छन्। साथै, प्रभावित आयोजनाका लागि सरकारले विशेष राहत तथा सहयोग प्याकेज घोषणा गर्नुपर्ने सुझाव पनि उनले दिएका छन्।

विपद्का बेला उद्धार कार्यसँगै विद्युत् सेवा पुनःस्थापनालाई प्राथमिकतामा राख्नुपर्ने विषयमा समेत छलफल भएको घिसिङले बताए। सुरुङमा फसेका व्यक्तिको उद्धारदेखि अवरुद्ध विद्युत् सेवा सञ्चालनसम्मका विषयमा प्रधानमन्त्रीसँग छलफल भएको उनको भनाइ छ।

जलविद्युत् आयोजना निर्माणका क्रममा सुरक्षालाई सुरुदेखि नै प्राथमिकतामा राख्नुपर्ने सुझावसमेत घिसिङले दिएका छन्। ‘सेफ्टी फर्स्ट’ अवधारणाअनुसार आयोजनाको प्रारम्भिक डिजाइनमै सुरक्षाको पक्ष समेट्नुपर्ने र आवश्यक परे डिजाइनमा समेत परिवर्तन गर्नुपर्ने उनले बताए।

बाढीपहिरोबाट प्रभावित नागरिकलाई लक्षित गरी विशेष राहत तथा सहयोगको प्याकेज ल्याउनुपर्ने विषयमा पनि छलफल भएको घिसिङले जानकारी दिए। प्रधानमन्त्री शाह बाढीपहिरोबाट भएको क्षतिप्रति गम्भीर रहेको र प्रभावित विद्युत् आयोजना तथा सेवा पुनःस्थापनाका लागि तत्काल पहल गर्नुपर्नेमा भेटवार्ताका क्रममा जोड दिइएको उनले बताए।