सुनसरीमा मंगलबार भएका दुई छुट्टाछुट्टै सवारी दुर्घटनामा रेडियो नेपालका प्राविधिक अधिकृतसहित दुई जनाको मृत्यु भएको छ। दुहवी नगरपालिका–११ सिमरबनास्थित पुलबाट बा७५प ३११० नम्बरको मोटरसाइकल खस्दा गढी गाउँपालिका–२ का ५५ वर्षीय प्रकाशलाल थान्दारको मृत्यु भएको जिल्ला प्रहरी कार्यालय सुनसरीका सूचना अधिकारी चन्द्रबहादुर खड्काले जानकारी दिए।

दुर्घटनामा गम्भीर घाइते भएका थान्दारलाई उपचारका लागि विराट शिक्षण अस्पताल लगिएको थियो। उपचारकै क्रममा उनको मृत्यु भएको प्रहरीले जनाएको छ। थान्दार रेडियो नेपालअन्तर्गत विराटनगरस्थित तारिणीप्रसाद कोइराला स्मृति सञ्चार ग्राममा प्राविधिक अधिकृतका रूपमा कार्यरत थिए।

त्यसैगरी, धरान उपमहानगरपालिका–८ गुराँस चोकमा मोटरसाइकल र सिटी सफारी आपसमा ठोक्किँदा इटहरी उपमहानगरपालिका–५ का ५५ वर्षीय राजेन्द्रप्रसाद घिमिरेको मृत्यु भएको छ।

मंगलबार साँझ भएको दुर्घटनामा गम्भीर घाइते घिमिरेको उपचारका क्रममा बीपी कोइराला स्वास्थ्य विज्ञान प्रतिष्ठान धरानमा मृत्यु भएको प्रहरीले जनाएको छ। दुवै दुर्घटनाबारे प्रहरीले आवश्यक अनुसन्धान गरिरहेको जनाएको छ।