पूर्व‍विश्वच्याम्पियन बक्सर जोलानी टेटेको दक्षिण अफ्रिकामा गोली हानी हत्या भएको छ । दक्षिण अफ्रिकी सरकारी अधिकारीहरूले ३८ वर्षीय टेटेको हत्या भएको पुष्टि गरेका छन् ।

दक्षिण अफ्रिकाका खेलकुद, कला तथा संस्कृति मन्त्री गेइटन म्याकेन्जीले शुक्रबार राति टेटे आफ्नै कारमा रहेका बेला गोली हानी हत्या गरिएको बताएका छन् । घटनामा कारमा रहेकी २७ वर्षीया एक महिलालाई पनि धेरै पटक गोली लागेको छ । उनी अस्पतालमा उपचाररत रहेको बताइएको छ ।

पुलिसका अनुसार घटना पूर्वी केप प्रान्तको म्दान्त्सानेमा भएको हो । टेटे आफ्नो घर पुगेर गेट खुल्ने प्रतीक्षामा रहेका बेला दुई जना सशस्त्र आक्रमणकारीले उनलाई लगाएर गोली हानेका थिए । आक्रमणकारीहरूले अनुहारमा मास्क लगाएका थिए ।

टेटेले सन् २००७ देखि २००८ सम्म डब्ल्यूबीएफ फ्लाइवेट विश्व उपाधि तथा सन् २०१७ र २०१९ मा डब्ल्यूबीओ ब्यान्टमवेट विश्व उपाधि जितेका थिए ।

उनको अन्तर्राष्ट्रिय करियरमा सन् २०१४ महत्वपूर्ण मोड बनेको थियो । जापानमा तेइरु किनोसितालाई अंकका आधारमा पराजित गर्दै उनले आईबीएफ जुनियर ब्यान्टमवेट विश्व उपाधि जितेका थिए । त्यसपछि उनले डब्ल्यूबीओ अन्तरिम उपाधि पनि कब्जा गरेका थिए ।

सन् २०१७ मा सिबोनिसो गोन्यासँगको विश्व उपाधि भिडन्तमा टेटेले पहिलो मुक्कामै केवल ११ सेकेन्डमा नकआउट गर्दै विश्व कीर्तिमान बनाएका थिए । यो विश्व उपाधि भिडन्तमा भएको सबैभन्दा छिटो नकआउटमध्ये एक हो ।

टेटेले व्यावसायिक बक्सिङ करियरमा २९ जित हासिल गरेका थिए, जसमा २२ वटा नकआउटबाट आएका थिए । उनले चार खेल हारेका थिए भने एउटा खेलको नतिजा रद्द भएको थियो ।

उनको अन्तिम खेल जुलाई २०२२ मा बेलायतको लन्डनस्थित वेम्बली एरिनामा भएको थियो । उक्त खेलमा उनले बेलायती बक्सर जेसन कनिङ्घमलाई पराजित गरेका थिए ।

तर पछि गरिएको परीक्षणमा टेटेको शरीरमा प्रतिबन्धित पदार्थ स्टानोजोलोल भेटिएपछि उक्त खेलको नतिजा उल्टाइएको थियो । उनलाई चार वर्षको प्रतिबन्धसमेत लगाइएको थियो । प्रतिबन्ध यसै वर्ष जुलाईमा समाप्त भएको थियो ।

टेटेले आफूले जानाजानी प्रतिबन्धित पदार्थ सेवन नगरेको निरन्तर दाबी गर्दै आएका थिए । प्रतिबन्ध सकिएपछि उनी पुनः बक्सिङमा फर्किने तयारीमा थिए । उनको निधनले दक्षिण अफ्रिकी बक्सिङ जगतमा ठूलो क्षति पुगेको छ ।