काठमाडौं — संसद्को प्रमुख प्रतिपक्षी दल नेपाली कांग्रेसको केन्द्रीय कार्यसमिति बैठक सुरु भएको छ। पार्टी सभापति गगनकुमार थापाको अध्यक्षतामा केन्द्रीय कार्यालय सानेपामा केहीबेरअघि बैठक सुरु भएको हो।

बैठकमा पार्टीको आगामी १५औँ महाधिवेशनको तयारी तथा मुलुकको पछिल्लो राजनीतिक परिस्थितिबारे विस्तृत छलफल हुने कांग्रेस केन्द्रीय सदस्य विजयबहादुर स्वाँरले जानकारी दिए।

उनका अनुसार बैठकमा महाधिवेशनको तयारी, नियमावली तथा निर्वाचन निर्देशिका निर्माण, सदस्यता अद्यावधिक र वितरणलगायत विषयमा छलफल हुनेछ। साथै महाधिवेशन तयारी समिति गठन तथा केन्द्रीय कार्यसम्पादन समितिका निर्णय अनुमोदन गर्ने प्रस्तावसमेत बैठकमा प्रस्तुत हुने जनाइएको छ।

बैठकमा तराई–मधेस क्षेत्रमा पछिल्लो समय भएका घटनाक्रम, सरकारको १०० दिनको समीक्षा, विपक्षी दलको भूमिका, प्रदेश सरकार तथा संगठनात्मक विषयमा पनि छलफल हुने स्वाँरले बताए।

यस्तै, समसामयिक राजनीतिक मुद्दा तथा भ्रातृ संस्थाका विधानका विषयमा समेत छलफल हुने कांग्रेस केन्द्रीय कार्यालयले जनाएको छ।