धनगढी । सुदूरपश्चिम प्रदेश सरकारले चार वटा प्रादेशिक अस्पताललाई सहिद दशरथ चन्द स्वास्थ्य विज्ञान विश्वविद्यालयको शिक्षण अस्पतालका रूपमा प्रयोग गर्ने निर्णय गरेको छ।

प्रदेश मन्त्रिपरिषद्को बैठकले कैलालीका सेती, लम्कीचुहा र टीकापुर तथा कञ्चनपुरको महाकाली प्रादेशिक अस्पताललाई यसै वर्षदेखि विश्वविद्यालयका शैक्षिक कार्यक्रम सञ्चालनका लागि प्रयोग गर्न स्वीकृति दिएको हो।

मुख्यमन्त्री शाहका प्रमुख स्वकीय सचिव प्रयागराज खनालका अनुसार विश्वविद्यालयको प्रावधानअनुसार सम्बन्धित निकायसँग सम्झौता गरी आवश्यक कानुनी तथा प्रशासनिक प्रक्रिया अघि बढाइनेछ।

सहिद दशरथ चन्द स्वास्थ्य विज्ञान विश्वविद्यालयसम्बन्धी ऐन, २०८२ को दफा २० मा नेपाल सरकार, प्रदेश सरकार वा स्थानीय तहको समन्वयमा अस्पतालसँग सम्झौता गरी शैक्षिक कार्यक्रम सञ्चालन गर्न वा शिक्षण अस्पतालका रूपमा उपयोग गर्न सक्ने व्यवस्था गरिएको छ।