भारत । भारतको हिमाली राज्य उत्तराखण्डमा निर्माणाधीन सुरुङमा पानी र भग्नावशेषसहित पहिरो खस्दा कम्तीमा सात जना कामदारको मृत्यु भएको छ भने १३ जना घाइते भएका छन्। दुर्घटनापछि तीन जना अझै बेपत्ता रहेको अधिकारीहरूले बताएका छन्।

राज्यद्वारा सञ्चालित जलविद्युत् परियोजनाका लागि सुरुङ निर्माण भइरहेको स्थानमा बिहीबार राति दुर्घटना भएको हो। राज्य विपद् व्यवस्थापन प्राधिकरणका अनुसार घटनास्थलबाट १९ जना कामदारको उद्धार गरिएको छ भने घाइते १३ जनाको उपचार भइरहेको छ।

उद्धारकर्मीहरूले पानी भरिएको सुरुङभित्र अस्थायी डुङ्गाको प्रयोग गरी बेपत्ता कामदारको खोजी गरिरहेका छन्। खोजी तथा उद्धार कार्य जारी रहेको अधिकारीहरूले बताएका छन्।

उत्तराखण्डमा पछिल्ला दिनमा परेको भारी मनसुनी वर्षाका कारण बाढी र पहिरोको जोखिम बढेको छ। हिमाली क्षेत्रमा लगातारको वर्षाले सडक, बस्ती तथा निर्माणस्थल थप जोखिममा परेका छन्।

वातावरणविद्हरूले कमजोर हिमाली भूभागमा अव्यवस्थित तथा अत्यधिक विकास परियोजना सञ्चालन गर्दा प्राकृतिक विपद्को जोखिम बढिरहेको चेतावनी दिँदै आएका छन्।

यसअघि सन् २०२३ मा उत्तराखण्डकै निर्माणाधीन सुरुङमा पहिरो खस्दा ४१ जना कामदार १७ दिनसम्म सुरुङभित्र फसेका थिए। लामो उद्धार अभियानपछि उनीहरूलाई सुरक्षित निकालिएको थियो।