झापा — झापाको कन्काई नगरपालिका–४ कोटीहोममा पिकअपको ठक्करबाट एक वृद्धको मृत्यु भएको छ।

जिल्ला ट्राफिक कार्यालय झापाका अनुसार पूर्व–पश्चिम राजमार्गअन्तर्गत कोटीहोम क्षेत्रमा दमकबाट बिर्तामोडतर्फ जाँदै गरेको मे १ च ५१०४ नम्बरको पिकअपले सडक पार गर्दै गरेका करिब ७० वर्षीय प्रल्हाद शिवाकोटीलाई ठक्कर दिएको हो।

दुर्घटनामा गम्भीर घाइते भएका शिवाकोटीको उपचारका लागि बिर्तामोड लैजाने क्रममा बाटोमै मृत्यु भएको प्रहरीले जनाएको छ।

दुर्घटनामा संलग्न पिकअप र चालकलाई प्रहरीले नियन्त्रणमा लिएर अनुसन्धान थालेको छ।