संस्कृति, पर्यटन तथा नागरिक उड्डयन मन्त्रालयले आर्थिक वर्ष २०८२/८३ को चौथो त्रैमासिकसम्म कुल विनियोजित बजेटको ३१.६८ प्रतिशत मात्रै खर्च गरेको छ। मन्त्रालयका अनुसार ७ अर्ब ६८ करोड ४ लाख रुपैयाँभन्दा बढी बजेटमध्ये समीक्षा अवधिसम्म २ अर्ब ४३ करोड ३४ लाख रुपैयाँ मात्रै खर्च भएको हो।

सार्वजनिक प्रगति विवरणअनुसार चालु खर्च ५८.१४ प्रतिशत पुगे पनि पुँजीगत खर्च भने १६.२१ प्रतिशतमा सीमित रहेको छ। यसले मन्त्रालयअन्तर्गतका विकास तथा पूर्वाधार आयोजनाको कार्यान्वयन अपेक्षाअनुसार हुन नसकेको देखाएको छ।

मन्त्रालयअन्तर्गत नेपाल पर्यटन तथा होटल व्यवस्थापन प्रतिष्ठानले ९९.५४ प्रतिशत बजेट खर्च गरी सबैभन्दा राम्रो प्रगति हासिल गरेको छ। लुम्बिनी विकास कोषले ९०.०६ प्रतिशत बजेट खर्च गरेको छ भने पर्यटन पूर्वाधार विकास आयोजनाले ४ अर्ब १७ करोड रुपैयाँभन्दा बढी बजेटमध्ये ७.५६ प्रतिशत मात्र खर्च गरेको छ। पशुपति क्षेत्र विकास कोषको खर्च पनि १४.७८ प्रतिशतमा सीमित रहेको मन्त्रालयले जनाएको छ।

यस्तै, मन्त्रालयको बेरुजु फर्छ्योटको अवस्था पनि कमजोर देखिएको छ। कुल ४ अर्ब ५९ करोड २२ लाख रुपैयाँ बेरुजुमध्ये गत आर्थिक वर्षमा १०.४२ प्रतिशत मात्रै फर्छ्योट भएको मन्त्रालयको तथ्याङ्कले देखाएको छ।