काठमाडौं — कुवेतको उत्तरी क्षेत्रमा जुलाई ३० मा भएको ड्रोन आक्रमणमा परी एक नेपाली नागरिकको मृत्यु भएको पुष्टि भएको छ।

कुवेतस्थित नेपाली राजदूतावासका अनुसार तेह्रथुमका ४४ वर्षीय सोमकुमार तामाङको उक्त आक्रमणमा परी निधन भएको हो। सवारी चालकका रूपमा कार्यरत तामाङको मृत्युबारे कुवेतको विदेश मन्त्रालयबाट आधिकारिक जानकारी प्राप्त भएको दूतावासले जनाएको छ।

राजदूतावासले तामाङको निधनप्रति दुःख व्यक्त गर्दै श्रद्धाञ्जली अर्पण गरेको छ। साथै, उनको पार्थिव शरीर यथाशीघ्र नेपाल पठाउन सम्बन्धित निकायसँग समन्वय गरी आवश्यक प्रक्रिया अघि बढाइने जनाएको छ।

यसैबीच, कुवेतमा रहेका नेपाली नागरिकलाई त्यहाँको सरकारले जारी गरेका सुरक्षा मापदण्ड पूर्ण रूपमा पालना गर्न, संयमित रहन र सुरक्षित स्थानमा बस्न नेपाली दूतावासले आग्रह गरेको छ।