दोलखा, ६ साउन — दोलखाको गौरीशंकर गाउँपालिका–९ मूलखर्कमा अविरल वर्षापछि गएको पहिरोमा परी ७५ वर्षीय चसमान तामाङ बेपत्ता भएका छन्।

स्थानीयका अनुसार वर्षासँगै खसेको पहिरोले तामाङलाई बगाएको हो। घटनाको जानकारी प्राप्त हुनासाथ सुरक्षाकर्मी र स्थानीयवासीको संयुक्त टोली घटनास्थलमा पुगेर बेपत्ताको खोजी कार्य जारी राखेको छ।

यस्तै, पहिरोका कारण जोखिममा परेका नजिकै सञ्चालित एक जलविद्युत् आयोजनामा कार्यरत चार जना कर्मचारीलाई उद्धार टोलीले सकुशल उद्धार गरेको छ। उद्धार गरिएका सबैलाई सुरक्षित स्थानमा सारिएको जनाइएको छ।

अविरल वर्षासँगै पहिरोको जोखिम बढ्दै गएपछि स्थानीय प्रशासनले जोखिमयुक्त क्षेत्रमा सतर्कता अपनाउन तथा अनावश्यक आवतजावत नगर्न सर्वसाधारणलाई आग्रह गरेको छ।