काठमाडौं । उपभोक्ता अदालतले प्रसूतिको क्रममा मृत्यु भएकी मनिता शर्माको परिवारलाई ३९ लाख रुपैयाँ क्षतिपूर्ति उपलब्ध गराउन आदेश दिएको छ।

अदालतले एभरेष्ट अस्पताल र उपचारमा संलग्न स्त्रीरोग विशेषज्ञ डा. ज्योत्सना शर्मा तिवारीका नाममा क्षतिपूर्ति भराउने फैसला गरेको हो। उपभोक्ता अदालतका सूचना अधिकारी होमनाथ कँडेलका अनुसार अस्पतालबाट ३० लाख रुपैयाँ र डा. तिवारीबाट ९ लाख रुपैयाँ क्षतिपूर्ति उपलब्ध गराउन आदेश दिइएको छ।

मनिताका श्रीमान् सुवास पराजुलीले उपचारमा चिकित्सक र अस्पतालको लापरबाहीका कारण श्रीमतीको मृत्यु भएको दाबी गर्दै उपभोक्ता अदालतमा मुद्दा दायर गरेका थिए।

मुद्दामाथिको सुनुवाइपछि अदालतले अस्पताल र चिकित्सक दुवैको दायित्व ठहर गर्दै पीडित परिवारलाई क्षतिपूर्ति उपलब्ध गराउने फैसला गरेको हो।

स्वास्थ्य सेवा प्रवाहमा चिकित्सक तथा स्वास्थ्य संस्थाको उत्तरदायित्व र बिरामीको अधिकारका दृष्टिले उक्त फैसला महत्त्वपूर्ण मानिएको छ।