काठमाडौं — सरकारले करार सेवामा कार्यरत कर्मचारीलाई हटाएर आउटसोर्सिङमार्फत नयाँ कर्मचारी भर्ना गर्ने तयारी गरेको भन्दै विभिन्न मन्त्रालयमा कार्यरत करार कर्मचारीहरूले सिंहदरबार अगाडि धर्ना दिएका छन्।

१८ वटै मन्त्रालयका करार कर्मचारी सहभागी आन्दोलनमा सरकारले अघि सारेको नीतिका कारण लामो समयदेखि करार सेवामा कार्यरत हजारौँ कर्मचारीको रोजगारी असुरक्षित हुने भन्दै निर्णय तत्काल फिर्ता लिन माग गरिएको छ।

आन्दोलनरत कर्मचारीहरूले आफूहरूको सेवा सुरक्षित गर्न, लामो समयदेखि कार्यरत कर्मचारीको भविष्य सुनिश्चित गर्न तथा आउटसोर्सिङ प्रणाली लागू गर्ने निर्णय रोक्न सरकारसँग आग्रह गरेका छन्।

सरकारले प्रशासनिक खर्च कटौती र मितव्ययिता अपनाउने उद्देश्यले आगामी आर्थिक वर्षदेखि करार तथा अस्थायी कर्मचारीको सट्टा आउटसोर्सिङमार्फत जनशक्ति व्यवस्थापन गर्ने तयारी गरेको बताइएपछि कर्मचारीहरू चरणबद्ध आन्दोलनमा उत्रिएका हुन्।

कर्मचारीहरूले सरकारले आफ्ना मागप्रति चासो नदेखाए आन्दोलनका कार्यक्रम थप सशक्त बनाउने चेतावनी समेत दिएका छन्।