कङ्गोमा फैलिएको इबोला प्रकोपले दुई महिनाभन्दा केही बढी अवधिमै एक हजारभन्दा बढी मानिसको ज्यान लिएको छ। यो गति सन् २०१४–२०१६ को सबैभन्दा भीषण इबोला महामारीको तुलनामा करिब तीन गुणा तीव्र रहेको तथ्याङ्कले देखाएको छ।

कङ्गोको स्वास्थ्य मन्त्रालयका अनुसार हालसम्म २ हजार ५३६ जनामा सङ्क्रमण पुष्टि भएको छ भने १ हजार ३३ जनाको मृत्यु भइसकेको छ। यो प्रकोप गत मे १५ मा औपचारिक रूपमा घोषणा गरिएको थियो।

हालको प्रकोप बुन्डिबुग्यो भाइरसका कारण फैलिएको हो। यो दुर्लभ प्रकारको इबोला भाइरस भएकाले यसको स्वीकृत खोप वा प्रभावकारी उपचार उपलब्ध छैन। प्रकोप मुख्य रूपमा पूर्वी कङ्गोका पाँच प्रान्तमा केन्द्रित रहेको छ।

स्वास्थ्य अधिकारीहरूका अनुसार हालको प्रकोपमा मृत्युदर करिब ४० प्रतिशत रहेको छ। पहिलो सङ्क्रमितको स्रोत पहिचान हुन नसक्नु र नयाँ सङ्क्रमितहरू निगरानी सूचीभन्दा बाहिरबाट भेटिनुले नियन्त्रण प्रयास थप चुनौतीपूर्ण बनेको छ।