काठमाडौं — नेपाल प्रहरीका महानिरीक्षक दानबहादुर कार्की र सशस्त्र प्रहरी बल नेपालका महानिरीक्षक नारायणदत्त पौडेल पाँचौँ संयुक्त राष्ट्रसङ्घीय प्रहरी प्रमुखको शिखर सम्मेलनमा सहभागी भई बुधबार स्वदेश फर्किएका छन्।

उनीहरूलाई त्रिभुवन अन्तर्राष्ट्रिय विमानस्थलमा नेपाल प्रहरी र सशस्त्र प्रहरी बलका प्रहरी अतिरिक्त महानिरीक्षक, नायब महानिरीक्षकलगायत वरिष्ठ प्रहरी अधिकृतहरूले स्वागत गरेका थिए।

संयुक्त राष्ट्रसङ्घको प्रधान कार्यालय न्युयोर्कमा असार २३ र २४ गते आयोजित सम्मेलनमा संयुक्त राष्ट्रसङ्घ र प्रहरी सङ्गठनबीचको सहकार्य, नयाँ प्रविधिको प्रयोग, अन्तर्राष्ट्रिय सहयोग, संगठनमा लैङ्गिक उत्तरदायित्व, भाषा तथा प्रशिक्षण र उच्चस्तरीय सञ्जाल निर्माणलगायत विषयमा छलफल भएको जनाइएको छ।

सम्मेलनका क्रममा महानिरीक्षकद्वय कार्की र पौडेलले संयुक्त राष्ट्रसङ्घका अधिकारी तथा विभिन्न देशका उच्चपदस्थ सुरक्षा अधिकारीसँग द्विपक्षीय भेटवार्ता समेत गरेका थिए।

उनीहरू सम्मेलनमा सहभागी हुन असार २१ गते न्युयोर्क प्रस्थान गरेका थिए।