काठमाडौं — जल तथा मौसम पूर्वानुमान महाशाखाले आज पनि नेपालको पूर्वी क्षेत्रमा मनसुनको प्रभाव कायम रहने जनाउँदै सम्भावित बाढी, पहिरो, गेग्रान बहाव तथा भूक्षयको जोखिमबाट बच्न आवश्यक सतर्कता अपनाउन आग्रह गरेको छ।

महाशाखाका वरिष्ठ मौसमविद् मीनकुमार अर्यालका अनुसार कोशी, बागमती र गण्डकी प्रदेशका तराई क्षेत्र तथा लुम्बिनी प्रदेशका पहाडी भूभागका एक–दुई स्थानमा भारी वर्षाको सम्भावना रहेको छ। उनले ती क्षेत्रमा मनसुनजन्य विपद्को जोखिम बढ्न सक्ने भएकाले सर्वसाधारणलाई विशेष सावधानी अपनाउन आग्रह गरे।

"भारी वर्षासँगै गेग्रान बहाव, बाढी, पहिरो तथा भूक्षयजस्ता प्रकोपको जोखिम रहने भएकाले आवश्यक सतर्कता अपनाउनुपर्छ," अर्यालले भने।

महाशाखाले जारी गरेको मौसमी बुलेटिनमा वर्षाका कारण दैनिक जनजीवन, कृषि, स्वास्थ्य, पर्यटन, पर्वतारोहण, सडक तथा हवाई यातायातमा समेत असर पर्न सक्ने उल्लेख गर्दै विभागबाट जारी हुने पछिल्ला मौसमसम्बन्धी सूचनामा नियमित अद्यावधिक रहन आग्रह गरिएको छ।

महाशाखाका अनुसार हाल मनसुनको न्यूनचापीय रेखा सरदर स्थानभन्दा केही उत्तरतर्फ, तराई भूभाग नजिक रहेको छ, जसका कारण देशका विभिन्न क्षेत्रमा वर्षा हुने क्रम जारी रहनेछ।

तीन दिनको मौसम पूर्वानुमान

आज राति देशभर सामान्यदेखि पूर्ण बदली रहनेछ। हिमाली भूभागका थोरै स्थानमा मेघगर्जन, चट्याङसहित मध्यम वर्षा तथा हिमपातको सम्भावना रहेको छ। मधेस प्रदेश तथा कोशी, बागमती, गण्डकी र लुम्बिनी प्रदेशका पहाडी र तराईका केही स्थान, साथै कर्णाली र सुदूरपश्चिम प्रदेशका थोरै स्थानमा मध्यम वर्षा हुन सक्ने अनुमान गरिएको छ।

बुधबार देशभर सामान्यदेखि पूर्ण बदली रहनेछ। देशका अधिकांश पहाडी तथा तराई क्षेत्रमा मेघगर्जन र चट्याङसहित मध्यम वर्षाको सम्भावना रहेको छ भने हिमाली भूभागका केही स्थानमा वर्षासँगै हिमपात पनि हुन सक्ने विभागले जनाएको छ।

बिहीबार पनि देशभर बदलीको अवस्था कायम रहनेछ। पहाडी भूभागका केही स्थान तथा बागमती, गण्डकी, लुम्बिनी र सुदूरपश्चिमका तराई क्षेत्रमा मध्यम वर्षाको सम्भावना रहेको छ। कोशी र मधेस प्रदेशका तराईका केही स्थानमा पनि वर्षा हुने पूर्वानुमान गरिएको छ। रातिको समयमा हिमाली भूभागका केही स्थानमा वर्षा र हिमपातको सम्भावना यथावत् रहने महाशाखाले जनाएको छ।