विद्युत् मर्मतका लागि खटिएको स्कारपियो दुर्घटना हुँदा दुई विद्युत् कर्मचारीको मृत्यु
धरान — नेपाल विद्युत् प्राधिकरण, धरान वितरण केन्द्रको विद्युत् मर्मत कार्यका लागि राति खटिएको स्कारपियो गाडी दुर्घटना हुँदा दुई कर्मचारीको मृत्यु भएको छ।
दुर्घटनामा धरान–१३ निवासी ३३ वर्षीय बिर्खबहादुर राई र धरान–१६ निवासी ४९ वर्षीय सुमन आचार्यको निधन भएको हो। मृतकमध्ये राई सेवा करारमा कार्यरत चालक थिए भने आचार्य नेपाल विद्युत् प्राधिकरणका स्थायी कर्मचारी रहेको बताइएको छ।
विद्युत् मर्मत कार्यका क्रममा राति परिचालन गरिएको गाडी दुर्घटनामा परेको हो। दुर्घटनाको विस्तृत कारणबारे सम्बन्धित निकायले अनुसन्धान गरिरहेको छ।
घटनापछि नेपाल विद्युत् प्राधिकरण धरान वितरण केन्द्रले मृतक कर्मचारीप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना प्रकट गरेको छ।
