काठमाडौं — स्ट्रेट अफ होर्मुज जलमार्ग अस्थायी रूपमा बन्द हुँदा १,२०० भन्दा बढी मालवाहक जहाजहरू करिब १२५ अर्ब अमेरिकी डलर बराबरको सामानसहित प्रभावित भएको तथ्य सार्वजनिक भएको छ।

बेलायती फाइनान्सियल टाइम्स (Financial Times) ले बीमा कम्पनी Allianz को प्रतिवेदनलाई उद्धृत गर्दै यो जानकारी दिएको हो।

प्रतिवेदनअनुसार समुद्री मार्ग बन्द भएपछि बीमा जोखिम व्यवस्थापनमा समेत ठूलो परिवर्तन आएको छ। Allianz का समुद्री प्रमुख जस्टस हेनरिकले महत्वपूर्ण जलमार्ग अवरुद्ध हुँदा बीमा कम्पनीहरूका लागि जोखिम मूल्यांकन प्रणाली पुनः मूल्याङ्कन गर्नुपर्ने अवस्था आएको बताएका छन्।

पछि संयुक्त राज्य अमेरिका र इरानबीच भएको सम्झौता र जलमार्ग पुनः खुला हुने निर्णयपछि ढुवानी क्रमशः सामान्य बन्दै गएको जनाइएको छ।

तथ्यांकअनुसार पछिल्लो एक हप्तामा ६९ वटा जहाज खाडी क्षेत्रबाट बाहिर निस्किएका छन्, जबकि अघिल्लो हप्ता मात्र २४ वटा जहाज बाहिरिएका थिए। फेब्रुअरीदेखि सुरु भएको द्वन्द्वपछि यो सबैभन्दा ठूलो साप्ताहिक ढुवानी संख्या हो।

द्वन्द्वका कारण समुद्री क्षेत्रमा ठूलो मानवीय र आर्थिक क्षति भएको बताइएको छ। अन्तर्राष्ट्रिय समुद्री संगठनका अनुसार १४ जना चालक दलका सदस्यको मृत्यु भएको छ भने ४० भन्दा बढी जहाजहरूमा क्षेप्यास्त्र आक्रमण भएको उल्लेख छ।