काठमाडौं, बिहीबार — नेकपा एमालेका संसदीय दलका प्रमुख सचेतक ऐन महरले वर्तमान सरकारमा सर्वसत्तावादी प्रवृत्ति देखिएको आरोप लगाएका छन्।

सिंहदरबारस्थित एमाले संसदीय दलको कार्यालयमा सञ्चारकर्मीसँग कुरा गर्दै महरले सरकार संविधान, ऐन–कानूनभन्दा माथि जस्तो गरी प्रस्तुत भइरहेको दाबी गरे।

उनका अनुसार, निरन्तरतामा क्रमभङ्गताको नाममा प्रचलित अभ्यास र कानूनी प्रक्रियालाई बेवास्ता गर्दै प्रधानमन्त्री अघि बढ्न खोजेको देखिन्छ। उनले सरकारसँगै सभामुखको भूमिकाप्रति पनि प्रश्न उठाएको बताए।

महरले सदनलाई सरकारको छायाजस्तो बनाउने गरी सभामुखको कार्यशैली देखिएको आरोप लगाउँदै संसद् अवरोध आफ्नो उद्देश्य नभएको स्पष्ट पारे। “जनताको आवाज रोक्ने हाम्रो चाहना होइन,” उनले भने।

उनले सरकारलाई उत्तरदायी बनाउने जिम्मेवारी प्रतिपक्षको भएको उल्लेख गर्दै लामो समय संसद् अवरोधले देशको हित नगर्ने कुरामा आफूहरू संवेदनशील रहेको बताए।

त्यस्तै, संसद्मा दर्ता भइसकेको आर्थिक विधेयकमा अर्थमन्त्रीले गरेको संशोधनले शंकास्पद चलखेलको आशंका उत्पन्न गरेको पनि महरले आरोप लगाए।