इस्लामाबाद — पाकिस्तानको निर्यात मे महिनामा ९.५९ प्रतिशतले वृद्धि भई दुई अर्ब ७० करोड अमेरिकी डलर पुगेको छ। यो तथ्यांक पाकिस्तान ब्युरो अफ स्ट्याटिस्टिक्स (पीबीएस) ले सार्वजनिक गरेको हो।

पीबीएसका अनुसार, अघिल्लो महिना (अप्रिल) मा निर्यात दुई अर्ब ४७ करोड डलर थियो। वार्षिक आधारमा पनि निर्यात १.२६ प्रतिशतले वृद्धि भएको देखिएको छ, जुन सन् २०२५ मे को दुई अर्ब ६७ करोड डलरबाट बढेर सन् २०२६ मे मा दुई अर्ब ७० करोड डलर पुगेको हो।

तर सोही अवधिमा आयात भने उल्लेखनीय रूपमा २१.४५ प्रतिशतले घट्दै पाँच अर्ब २९ करोड डलरमा झरेको छ। अघिल्लो महिना आयात पाँच अर्ब ६६ करोड डलर रहेको थियो।

आयात घटेसँगै मे महिनाको व्यापार घाटा ३९.४३ प्रतिशतले घटेर दुई अर्ब ५९ करोड डलरमा सीमित भएको पीबीएसले जनाएको छ।

आर्थिक वर्ष २०२५–२६ (जुलाई–मे) को पहिलो ११ महिनामा भने चित्र फरक देखिएको छ। सो अवधिमा पाकिस्तानको निर्यात ५.६ प्रतिशतले घटेर २७ अर्ब नौ करोड डलरमा पुगेको छ, जुन अघिल्लो वर्षको समान अवधिमा २९ अर्ब ५६ करोड डलर थियो।

यसैबीच, सोही ११ महिनामा आयात ५.९४ प्रतिशतले बढेर ६२ अर्ब ६६ करोड डलर पुगेको छ। परिणामस्वरूप व्यापार घाटा १७.४८ प्रतिशतले बढेर ३४ अर्ब ७६ करोड डलर पुगेको पीबीएसको तथ्यांकले देखाएको छ।