स्टकहोम — स्विडेनको सार्वजनिक स्वास्थ्य एजेन्सीले अभिभावकको अत्यधिक मोबाइल प्रयोगले बालबालिकाको व्यवहार, बानी तथा पारिवारिक सम्बन्धमा असर पार्न सक्ने भन्दै बच्चासँग समय बिताउँदा फोनको प्रयोग सीमित गर्न आग्रह गरेको छ।

सोमबार जारी गरिएको नयाँ मार्गनिर्देशनमा एजेन्सीले अभिभावकलाई बालबालिकासँग हुँदा सकेसम्म मोबाइल फोन टाढा राख्न र अत्यावश्यक अवस्थामा मात्र प्रयोग गर्न सुझाव दिएको हो। एजेन्सीका अनुसार पछिल्ला अनुसन्धानहरूले अभिभावकको अत्यधिक स्क्रिन प्रयोगले बालबालिकासँग हुने प्रत्यक्ष संवाद र भावनात्मक सम्बन्धमा नकारात्मक प्रभाव पार्न सक्ने देखाएका छन्।

एजेन्सीले अभिभावकलाई आफ्नै जीवनमा पनि स्वस्थ डिजिटल बानी विकास गर्न आग्रह गरेको छ। बालबालिकाले वयस्कहरूको व्यवहारबाट सिक्ने भएकाले अभिभावकको मोबाइल तथा स्क्रिन प्रयोगले उनीहरूको बानी र आचरणमा प्रत्यक्ष प्रभाव पार्ने अनुसन्धानले देखाएको छ।

नयाँ सिफारिसमा घरभित्र ‘स्क्रिन–मुक्त क्षेत्र’ बनाउने अभ्यासलाई पनि प्राथमिकता दिइएको छ। शयनकक्ष, भोजन गर्ने स्थान तथा परिवारसँग समय बिताउने ठाउँमा मोबाइल वा अन्य स्क्रिनयुक्त उपकरणको प्रयोग नगर्न सुझाव दिइएको छ।

एजेन्सीकी मनोचिकित्सक हेलेना फ्रिलिङ्स्डोर्फका अनुसार बालबालिका वयस्कहरूले के भन्छन् भन्ने मात्र होइन, उनीहरूले के गर्छन् भन्ने कुराबाट पनि प्रभावित हुन्छन्। उनका अनुसार दैनिक जीवनमा गरिने साना परिवर्तनहरूले पारिवारिक सम्बन्ध सुधार्नुका साथै बालबालिकामा सकारात्मक बानी विकास गर्न मद्दत गर्न सक्छ।

बालबालिकाको बढ्दो स्क्रिन समय नियन्त्रण गर्न स्विडेनले पछिल्ला वर्षहरूमा विभिन्न कदम चाल्दै आएको छ। यसैक्रममा सरकारले कक्षा ९ सम्मका विद्यार्थीलाई विद्यालयभित्र स्मार्टफोन प्रयोग गर्न नदिने योजना सार्वजनिक गरेको थियो। प्रस्तावित नियम लागू भएमा करिब १५–१६ वर्ष उमेरसम्मका विद्यार्थीले विद्यालयमा स्मार्टफोन प्रयोग गर्न पाउने छैनन्।

स्विडेनको यो सिफारिसलाई मोबाइल प्रयोग घटाउने प्रयास मात्र नभई परिवारभित्र प्रत्यक्ष संवाद, सहभागिता र स्वस्थ डिजिटल संस्कार प्रवर्द्धन गर्ने अभियानका रूपमा हेरिएको छ।