उत्तर प्रदेश — भारतको उत्तर प्रदेशस्थित राम मन्दिरमा चोरी तथा प्रसादको दुरुपयोग गरेको आरोपमा आठ जनालाई प्रहरीले पक्राउ गरेको छ।

भारतीय प्रहरीले बिहीबार जारी गरेको विज्ञप्तिमा मन्दिरका कर्मचारीसहित आठ जनालाई पक्राउ गरिएको उल्लेख गर्दै चन्दा तथा दान व्यवस्थापनमा अनियमितता भएको आरोपमा आपराधिक मुद्दा दर्ता गरिएको जनाएको छ।

पक्राउ परेकामध्ये केही व्यक्ति नगद, भक्तजनले दान गरेको सुन–चाँदीसहितका बहुमूल्य वस्तुहरूको गणना तथा व्यवस्थापनमा संलग्न रहेको बताइएको छ। भारतीय मिडिया रिपोर्टहरूका अनुसार उक्त प्रकरणमा दुई करोड अमेरिकी डलरभन्दा बढी रकमको अपचलन भएको हुन सक्ने अनुमान गरिएको छ।

प्रहरीले पक्राउ परेकामाथि आपराधिक विश्वासघात, चोरी, आपराधिक षड्यन्त्र तथा भ्रष्टाचारसम्बन्धी मुद्दा लगाइएको जनाएको छ।

यसैबीच उत्तर प्रदेशका मुख्यमन्त्री योगी आदित्यनाथले घटनाबारे अनुसन्धान गर्न विशेष अनुसन्धान टोली (SIT) गठन गरिएको जानकारी दिँदै कुनै पनि दोषीलाई उन्मुक्ति नदिने प्रतिबद्धता व्यक्त गरेका छन्।

घटनाबारे थप अनुसन्धान जारी रहेको भारतीय प्रहरीले जनाएको छ।